Tehnoparkterge salyqtyq jeńildikter kerek - Májilis
ASTANA. 7 aqpan. QazAqparat - Búgin QR Parlamenti Májilisi Áleýmettik-mádenı damý komıtetiniń otyrysy ótip, onda elimizdegi tehnoparkter qyzmetin jetildirý máseleleri qaraldy.
Jıyn barysynda komıtet múshesi Ýálıhan Bıshimbaev, 2004-2009 jyldar aralyǵyndaǵy elimizdiń tehnopark qyzmetine jasalǵan saraptamalyq zertteýlerdiń qorytyndysyn jarııa etti. Atalǵan zertteý barysynda uıymdastyrý jumystarynda birqatar júıeli kemshilikter anyqtalǵan. Máselen, depýtattyń aıtýynsha, tehnoparkterde jarǵylyq kapıtaldy qalyptastyrý, ınfraqurylym qurý máseleleri kúrdeli kúıinde qalyp otyrǵany belgili bolǵan. «Óńirlerdegi tehnoparkterde joǵary oqý oryndarymen jáne ǵylymı-zertteý ınstıtýttarymen, sondaı-aq bıznes ortamen ózara tyǵyz baılanys qamtamasyz etilmeı keledi. Joǵary oqý oryndary men ǵylymı-zertteý ınstıtýttarynda zııatkerlik menshikti paıdalaný praktıkasynyń joqtyǵyna oraı, kóptegen qarama qaıshylyqtar da oryn alyp otyr», - deıdi depýtat Ý. Bıshimbaev. Osyǵan oraı, komıtet depýtattary «Indýstrıaldyq-ınnovatsııalyq qyzmetti memlekettik qoldaý týraly» zańǵa ózgerister men tolyqtyrýlar engizýdi usynady.
Budan bólek, Májilis depýtattary ınnovatsııalyq úderistiń barlyq qatysýshylaryna tehnoparkter qurýǵa múmkindikter berýdi usynady. «Al tehnoparkterge tıisti salyqtyq jeńildikter qaralǵany ıgi», - deıdi depýtat Ý. Bıshimbaev.
