Tehnologııalardy paıdalanýshydan olardy jasaýshyǵa aınalý: Qazaqstannyń álemdik BAQ nazaryndaǵy áleýeti
ASTANA. KAZINFORM — Qazaqstandyq mamandar álemdik naryqqa arnalǵan jasandy ıntellekt ónimderin ázirleýge qatysyp jatyr. Sonyń biri — jasandy ıntellekt kómegimen beınejazba jasaýǵa mamandanǵan Higgsfield startapy. Kompanııanyń damýy NVIDIA men TCV sııaqty iri ınvestorlardyń nazaryn aýdardy. Brıtanııalyq Global Banking & Finance Review halyqaralyq qarjy-saraptamalyq basylymy osy jobaǵa toqtalyp, Qazaqstannyń álemdik jasandy ıntellekt naryǵyndaǵy múmkindikterine sholý jasady.
Higgsfield jasandy ıntellekt kómegimen beınejazba jasaýǵa arnalǵan quraldar ázirleıdi. Kompanııanyń málimetinshe, platformada tirkelgen paıdalanýshylar sany 40 mıllıonnan asqan. Jobanyń Qazaqstanmen de tikeleı baılanysy bar. Elimizde onyń ónimderin ázirleýge jáne damytýǵa qatysatyn 300-den astam maman jumys isteıdi.
Basylym bul jobany qazaqstandyq mamandardyń halyqaralyq naryqqa arnalǵan tehnologııalardy jasaýǵa qatysa alatynyn kórsetetin mysaldardyń biri retinde qarastyrady.
Higgsfield álemdik ınvestorlardyń nazaryn qalaı aýdardy?
Higgsfield halyqaralyq naryqtaǵy qyzmetin keńeıtý úshin ınvestıtsııa tartyp keledi.
2026 jyldyń tamyzynda kompanııa Series B ınvestıtsııalyq kezeńinde 400 mıllıon dollar qarjy tartty. Sol kezde startap 5,4 mıllıard dollarǵa baǵalandy.
Qazan aıynda kompanııa osy ınvestıtsııalyq kezeńdi keńeıtip, NVIDIA tehnologııalyq kompanııasy men TCV ınvestıtsııalyq qorynan qosymsha qarjy tartqanyn habarlady.
Іri ınvestorlardyń bul jobaǵa qarjy salýy jasandy ıntellekt arqyly beınejazba jasaý jáne óńdeý tehnologııalaryna qyzyǵýshylyqtyń artyp kele jatqanyn kórsetedi.
Qazaqstan mundaı jobalardan qandaı paıda kóre alady?
Higgsfield sııaqty jobalardyń el ekonomıkasyna ákeletin paıdasy tartylǵan ınvestıtsııa kólemimen ǵana ólshenbeıdi.
Eń aldymen, mundaı kompanııalardyń Qazaqstanda qansha mamandy jumyspen qamtıtyny, jańa tehnologııalardy qaıda ázirleıtini jáne mamandardyń kásibı damýyna qandaı múmkindik beretini mańyzdy. Sondaı-aq jasalǵan ónimderge zııatkerlik menshik quqyqtarynyń kimge tıesili ekeni de nazardan tys qalmaýy kerek.
Bul baǵyt Prezıdent Qasym-Jomart Toqaevtyń Qazaqstan halqyna Joldaýynda aıqyndalǵan mindettermen sabaqtas. Memleket basshysy jasandy ıntellektini is júzinde qoldanýǵa, eńbek ónimdiligin arttyrýǵa jáne joǵary tehnologııalyq salalardy damytýǵa basymdyq bergen bolatyn.
Mundaǵy maqsat — jańa tehnologııalardy paıdalaný arqyly qosylǵan quny joǵary ónimder shyǵarýǵa jaǵdaı jasaý.
Osy turǵydan alǵanda, tehnologııalyq kompanııalarǵa tartylǵan ınvestıtsııamen qatar, olardyń Qazaqstanda qandaı múmkindikter qalyptastyratyny da mańyzdy. Atap aıtqanda, bilikti mamandar daıarlaý, jańa jumys oryndaryn ashý, ǵylymı zertteýler júrgizý jáne halyqaralyq naryqta suranysqa ıe ónimder ázirleý máseleleri aldyńǵy orynǵa shyǵady.
Qazaqstannyń tsıfrlyq sektory qalaı damyp jatyr?
Higgsfield jobasynyń damýy Qazaqstannyń tehnologııalyq salasyndaǵy ózgeristermen qatar júrip jatyr.Halyqaralyq tájirıbede naryqtyq quny 1 mıllıard dollardan asatyn startaptar «syńarmúıiz» (unicorn) dep atalady. Higgsfield te osyndaı kompanııalardyń qataryna kiredi. Degenmen kompanııanyń joǵary baǵalanýy onyń el ekonomıkasyna dál sondaı kólemde paıda ákeletinin bildirmeıdi.
Ekonomıkalyq nátıje Qazaqstanda qansha maman jumys isteıtinine, negizgi tehnologııalardyń qaıda ázirlenetinine, eksporttan qansha tabys túsetinine jáne zııatkerlik menshik quqyqtarynyń elde saqtalýyna baılanysty.
Sońǵy jyldary Qazaqstannyń tsıfrlyq sektorynda da aıtarlyqtaı ósim baıqalady. Máselen, elimizde ǵylymı-zertteý jáne tájirıbelik-konstrýktorlyq jumystarǵa jumsalǵan ishki shyǵyndar 2018 jylǵy 72,2 mıllıard teńgeden 2025 jyly 261,5 mıllıard teńgege jetken.
Al IT-qyzmetter eksporty 2020 jylǵy 33,5 mıllıon dollardan 2025 jyly 1,142 mıllıard dollarǵa deıin ulǵaıǵan. Bul sandar Higgsfield kompanııasynyń qarjylyq nátıjelerin emes, Qazaqstannyń jalpy tsıfrlyq sektorynyń damý kórsetkishterin sıpattaıdy.
Basylym avtorlary mundaı ósim el ekonomıkasynda tsıfrlyq tehnologııalardyń mańyzy artyp kele jatqanyn kórsetetinin atap ótedi.
Endigi mindet — qazaqstandyq mamandar qatysatyn tehnologııalyq kompanııalardyń halyqaralyq jetistikteri el ekonomıkasyna uzaq merzimdi paıda ákelýi úshin jaǵdaı jasaý. Bul rette bilikti mamandar daıarlaý, otandyq tehnologııalardy qoldaý, jańa jumys oryndaryn ashý jáne tsıfrlyq qyzmetter eksportyn keńeıtý mańyzdy.
Aıta keteıik, buǵan deıin Qazaqstannyń Eýropadaǵy jasandy ıntellekt ınfraqurylymynyń mańyzdy ortalyǵyna aınalý múmkindigi týraly jazǵan edik.
