«Tehnıkalyq jáne kásiptik bilim» jýrnalynyń kezekti sany jaryqqa shyqty
ASTANA. 8 qazan. QazAqparat - Bul basylymnyń menshik ıesi «Tehnıkalyq jáne kásiptik bilimdi damytýdyń jáne biliktilikti berýdiń respýblıkalyq ǵylymı-ádistemelik ortalyǵy» aktsıonerlik qoǵamy bolyp tabylady.
Memlekettik jáne orys tilinde shyǵatyn osy aqparattyq-ádistemelik jýrnalda elimizdegi bilim men ǵylymnyń damýy, qol jetkizgen tabystary qamtylady. Jýrnaldyń bas redaktory Ábdimútálip Ábjapparov oqyrmandarǵa arnaǵan sózinde Memleket basshysy Nursultan Nazarbaevtyń Astana mektepteriniń úzdik oqýshylarymen ótkizgen «Patrıottyq tárbıe» sabaǵynyń mańyzdylyǵyna toqtalǵan. Elbasynyń bul ónegesi jas urpaqtyń patrıottyq sezimin janyp, erekshe sezimge bólegen aıtýly oqıǵa bolǵanyn atap ótken. «Bilim - baqytqa jetýdiń joly, dúnıeni tanýdyń kilti»,- deı kelip, óz oıyn bilimdi urpaq, bilikti maman, jarqyn zaman bolsyn degen tilegimen aıaqtaǵan. Ózekti taqyryp retinde jýrnalda Bilim jáne ǵylym mınıstrligi Tehnıkalyq jáne kásiptik bilim departamentiniń dırektory Qadyrbek Bóribekovpen júrgizilgen suhbat oqyrman nazaryna usynylǵan. Suhbatta Qazaqstandaǵy tehnıkalyq bilimniń órken jaıýy, álemdik tájirıbeler týraly máseleler qamtylǵan. «Tehnıkalyq jáne kásiptik bilimdi damytýdyń jáne biliktilikti berýdiń respýblıkalyq ǵylymı-ádistemelik ortalyǵy» AQ-ynyń basshylyǵy men Saýd Arabııasy Koroldigi Tehnıkalyq jáne kásiptik oqytý korporatsııasynyń ókilderimen ótkizgen halyqaralyq júzdesý de jýrnalda kórinis tapqan. Tehnıkalyq jáne kásiptik bilim berý salasynyń óńirlerdegi qyzmeti de basylymnan oryn alǵan. Sondaı-aq jýrnaldyń arnaıy toptamasynda 110 jyldyq mereıtoıyn atap ótip otyrǵan Muhtar Áýezov atyndaǵy Semeı pedagogıkalyq kolledjiniń tynys-tirshiligi, jetistikteri, damý joly týraly materıaldar berilgen. Kolledj dırektory Shaǵangúl Janaeva ulylardyń ulaǵaty daryǵan baıyrǵy bilim ordasy týraly oılaryn ortaǵa salǵan. Al osy kolledjdiń pedagogıka pániniń oqytýshysy Márııam Bıtebaeva «Qazaq halqynyń aqyl-oı tárbıesiniń negizderi» atty tanymdyq maqalasynda jas urpaqtyń boıyna ulttyq qundylyqtardy qalaı darytýǵa bolatyny jóninde óz paıymdaýlaryn alǵa tosqan. «Urpaq tárbıesi - Qazaqstanda júrip jatqan reformalar men ǵylymı-tehnıkalyq damýdyń alǵy sharttarynyń biri. Jańa qoǵam qazirgi adamdardan tez oılap, jyldam sheshim qabyldaýdy talap etedi. Sondyqtan da qazaq halqynyń óte áridegi ata-babalarynyń ómir súrgeninen bastaý alyp, kúni búginge deıin qoldanylyp kele jatqan rýhanı murasynyń biri - aqyl-oı tárbıesiniń negizderin búgingi urpaq tárbıesinde keńinen qolǵa alý qajettiligi týyp tur. Aqyl-oı tárbıesi - jetkinshek urpaq tárbıesiniń bir baǵyty jáne tárbıeniń asa mańyzdy quramdy bólikteriniń biri. Aqyl-oı tárbıesiniń qýatty quraly - til. Oı tilsiz damymaıdy. Til men oıdyń birligi - aqyl-sananyń damýyna múmkindik týǵyzady. Aqyl-oı tárbıesi - balalardyń oılaý qabiletin damytýǵa, ıntelektýaldyq aqyl-oı sanasyn jáne dúnıege ǵylymı kózqarasyn jetildirýge, oı eńbegi mádenıetin qalyptastyrýǵa baǵyttalǵan is-áreket»,- deıdi tálimger ustaz.
