Tehnıkalyq jáne kásiptik bilim berý: Talapker 4 mamandyq pen 4 kolledjdi tańdaı alady

NUR-SULTAN. QazAqparat – Tehnıkalyq jáne kásiptik bilim berý baǵytynda kolledjge túskisi keletin talapkerlerge birneshe mamandyqty tańdaý múmkindigi beriledi. Bul týraly QR BǴM Tehnıkalyq jáne kásiptik bilim berý departamentiniń dırektory Nasymjan Ospanova málim etti, dep habarlaıdy QazAqparat tilshisi.

«Prezıdent tapsyrmasyna sáıkes bizdiń mınıstrlik kásiporyndardyń suranysy boıynsha kadrlardy maqsatty daıarlaýǵa kóshti. Bul úshin kásiporyn kolledjben maqsatty daıyndyq týraly shart jasasady. Osylaısha kásiporyn óz bazasynda pedagogter men stýdentterdiń praktıkasyn uıymdastyrý, túlekterdi jumysqa ornalastyrý mindetin ózine alady. Atalǵan shara bolashaq kadrdyń jumys berýshiniń talaptaryna sáıkes bolýyn qamtamasyz etedi. Sebebi olar bilim berý baǵdarlamalaryn ázirleýge qatysady. Sondaı-aq, stýdentten qorytyndy emtıhan qabyldap, praktıkadan ótkizip, oqýdy bitirgennen keıin jumysqa alady», - dedi Nasymjan Ospanova Ortalyq kommýnıkatsııalar qyzmeti alańynda ótken baspasóz máslıhatynda.

Mınıstrlik ókiliniń aıtýynsha, bıyl kolledjderge qujat qabyldaý 20 maýsymnan bastalady.

«Osy jyldyń ózinde kásiporyndardyń maqsatty tapsyrysy boıynsha 10 myńnan astam talapkerdi qamtý josparlanyp otyr. Ár talapkerdiń 4 mamandyq pen 4 kolledjdi tańdaýǵa múmkindigi bar. Pedagogıkalyq mamandyqtarǵa túsý úshin 4 ballǵa deıin shekti bal jáne esse jazý talaby bar», - deıdi ol.

Buǵan deıin departament basshysy tehnıkalyq jáne kásiptik bilim berýge memlekettik tapsyrystyń artqanyn aıtqan edi.