Tehnıkalyq tekserýler barysynda 132 myńǵa tarta kólikterden aqaýlar anyqtaldy
ASTANA. 4 maýsym. QazAqparat - 2012 jyly tehnıkalyq tekserýler barysynda 132 myńǵa tarta kólikten aqaýlar anyqtaldy. Bulardyń basym bóligi jol-kólik oqıǵalaryn týdyrý yqtımaldyǵyna ıe bolyp tabylady. Búgin Májiliste «Jol júrisi týraly» zań jobalaryn talqylaýǵa arnalǵan dóńgelek ústelde Kólik jáne kommýnıkatsııa vıtse-mınıstri Roman Sklıar osylaı málim etti.
«Aqaýlary anyqtalǵan kólikterdiń 89 paıyzy jeke tulǵalarǵa tıesili bolyp otyr. Sonymen qatar, kommertsııalyq emes transporttardan tehnıkalyq baıqaýlardy alyp tastaý máselesine kelsek, álemdik tájirıbede bul basqasha óris alyp keledi. Máselen, Grýzııada jeńil avtokólikterdiń tehnıkalyq baıqaýlary 2013 jylǵa deıin toqtatylyp, ońtaıly júıe daıyndaý qolǵa alynǵan bolatyn. Alaıda, ol elde 2014 jyldyń basynan bastap mindetti tehnıkalyq baıqaý qaıta kúshine enetin bolady», - deıdi R. Sklıar.
Onyń aıtýynsha, Qyrǵyzstanda da jeńil avtokólikterdiń tehnıkalyq tekserýleri 2012 jyldan beri erikti negizde júzege asyp keledi. Alaıda, qyrǵyz tarapy mindetti tekserýge qaıta kóshý máselesin qarastyryp jatqanǵa uqsaıdy. «AQSh-tyń 13 shtatynda kólikterdi tehnıkalyq tekserýden ótkizý tolyǵymen alynyp tastalǵan. Qalǵan 37 shtatynda tehbaıqaý áli kúshinde. Al Ýkraınada jeńil jeke kólikter úshin tehnıkalyq tekserýler alynyp tastalǵan edi. Degenmen, sońǵy ýaqytta osy elde kólik aqaýyna qatysty apattardyń kórsetkishi ósip keledi», - deıdi R. Sklıar.
