Tehnıkalyq sharttardy berý is-sharalary ázirlendi - Tabıǵı monopolııalardy zertteý agenttigi
ASTANA. 4 mamyr. QazAqparat - Tabıǵı monopolııalardy zertteý agenttigi tehnıkalyq sharttardy berý is-sharalaryn ázirledi.
Bul týraly búgin elordada uıymdastyrylǵan brıfıng barysynda atalǵan agenttiktiń basshysy Murat Ospanov málim etti.
Onyń atap ótýinshe, aǵymdaǵy jyldyń 10 sáýirinde ótken kásipkerler keńesinde Elbasy Nursultan Nazarbaev tehnıkalyq sharttardy berý máselesin jan-jaqty qarastyrýdy tapsyrǵan.
«Biz osy baǵytta jumys júrgizip bitirdik. Basqa memlekettik organdarmen birlesip tehnıkalyq sharttardy berýge arnalǵan is-sharany ázirledik. Ol «Bir tereze» qaǵıdaty boıynsha sheshiledi»,-dedi agenttik tóraǵasy.
Onyń atap ótýinshe, bul is-sharalar kelesi aptada Úkimet qaraýyna engiziledi. Al, qazirgi ýaqytta ol memlekettik organdarǵa kelisýge jiberildi.
«Biz, Kólik jáne kommýnıkatsııa mınıstrligi men halyqqa qyzmet kórsetý ortalyqtary arqyly tehnıkalyq sharttardy berýge ótinimderdi qabyldaý múmkinshiligi máselelerin qarastyrdyq. Sondaı-aq, Óńirlik damý mınıstrligimen birlesip, sý, jylý, gazben qamtamasyz etýge tehnıkalyq sharttar berý boıynsha erejeler josparyn ázirledik. Elektrmen jabdyqtaýǵa tehnıkalyq sharttar berý tártibine ózgertýler engiziletin bolady. Atalǵan másele qazirgi ýaqytta Indýstrııa jáne jańa tehnologııalar mınıstrligimen talqylandy»,-dep atap ótken M. Ospanov bul jobalar barlyq problemaly máselelerdi sheshýge múmkinshilik beretindigin senimmen atap ótti.
