Tehnıkalyq retteý jáne metrologııa komıteti kásipkerlerden yntymaqtastyq týraly kelisimdi negizsiz talap etken

Bul týraly búgin QR Bas prokýratýrasynyń resmı ókili Nurdálet Súıindikov BAQ ókilderimen bolǵan baspasóz máslıhaty barysynda málim etti.

«Bas prokýratýranyń Tehnıkalyq retteý jáne metrologııa komıtetine júrgizgen tekserýi barysynda atalǵan vedomstvonyń aýmaqtyq bólimsheleri taýardyń qaıdan shyqqany týraly sertıfıkat berý kezinde, Indýstrııa jáne saýda mınıstrliginiń zańǵa qaıshy buıryǵyna súıene otyryp, kásipkerlerden tehnıkalyq retteý salasyndaǵy ýákiletti organmen yntymaqtastyq týraly kelisimdi negizsiz talap etkenin anyqtady», dep atap ótken resmı ókil, Bas prokýratýranyń narazylyǵy boıynsha bıznesmenderdiń quqyǵyna nuqsan keltiretin atalǵan zańsyz buıryqtyń kúshi joıylǵandyǵyn jetkizdi.

Onyń aıtýynsha, komıtet kásipkerlik qyzmetke zańsyz aralasýdyń júzdegen faktisine jol bergen. Atalǵan mekeme men onyń aýmaqtyq bólimshelerindegi tekserý qorytyndysyna oraı prokýratýra organdary zańdylyqty joıý týraly 74 usynys engizip, 4 narazylyq keltirgen. Sonymen qatar ákimshilik jáne tártiptik jaýapkershilikke 100-den astam tulǵa tartylyp, 6 materıal protsessýaldyq sheshim qabyldaý úshin qylmystyq qýdalaý organdaryna joldanǵan.

«Bas prokýratýranyń usynysyn qaraý nátıjesinde Indýstrııa jáne jańa tehnologııalar mınıstrligi zań buzýshylyqtarǵa jol beretin sebepter men jaǵdaılardy joıý maqsatynda tehnıkalyq retteý salasynda 6 normatıvtik-quqyqtyq akti qabyldady. Onyń ishinde memlekettik standarttardy jasaý jáne bekitý, tehnıkalyq-ekonomıkalyq suryptaýlar erejesi de bar», dep naqtylaı tústi N.Súıindikov.