Tehnıkalyq retteý salasyn tsıfrlandyrý máseleleri qaraldy

ASTANA. QazAqparat - QR Premer-Mınıstriniń orynbasary – saýda jáne ıntegratsııa mınıstri Serik Jumanǵarın tehnıkalyq retteý salasyndaǵy tsıfrlandyrý máseleleri boıynsha keńes ótkizdi. Bul týraly QazAqparat Úkimettiń saıtyna silteme jasap habarlaıdy.

Keńes barysynda saýda jáne ıntegratsııa vıtse-mınıstri Qaırat Balyqbaev Tehnıkalyq retteý jáne metrologııa komıtetiniń «e-TRMK» memlekettik aqparattyq júıesin engizý sheńberinde atqarǵan jumystary týraly baıandady.

«Zańnamada talap etiletin aqparattyq qaýipsizdiktiń 70-ten astam normatıvtik-tehnıkalyq qujaty ázirlendi jáne bekitildi, mysaly: aqparattyq qaýipsizdik saıasaty, táýekelderdi baǵalaý ádistemesi, qoljetimdilik quqyqtaryn saralaý erejeleri jáne t. b. Sondaı-aq memlekettik derekter bazasymen ıntegratsııalyq jumystar júrgizildi. UAO-nyń 120 jáne QazStandarttyń 70-ke jýyq bıznes-úderisi tsıfrlandyryldy», — dedi Q. Balyqbaev.

Ázirleýshilerdiń derekteri boıynsha, memlekettik júıe engizilgen 2,5 aı ishinde 1 500-den astam uıym, 1236 qurylymdyq bólimshe, 10 myń kabınet, 292 ótinish berýshiler kabıneti tirkelgen. «UAO» RMK jumysynda bastapqy akkredıtteý boıynsha 25 ótinim túsken. Júıe SM sertıfıkattaryn alýǵa 633 ótinim qabyldady, onyń ishinde 324 sertıfıkat berildi.

Sonymen qatar júıeni engizý sheńberinde paıdalanýshylardan kelesi baǵyttar boıynsha birqatar usynystar men eskertýler tústi: júıede tirkeý; derekterdi toltyrý («saqtaý», «óńdeý» batyrmalary jumys istemegen), akkredıtteý týraly ótinimder (olar buryn «UAO» RMK jaýapty qyzmetkerlerine túspegen), metrologııa jáne standarttaý (QR MÓJ tizilimi joq). Búgingi tańda qateler 80%-ǵa joıyldy. Premer-Mınıstrdiń orynbasary Serik Jumanǵarın barlyq olqylyqtardy qysqa merzimde joıýdy tapsyrdy.

«Aldaǵy ýaqytta tájirıbelik júzege asyrý barysynda jáne paıdalanýshylardyń usynystary boıynsha anyqtalǵan sáıkessizdikterdi joıý jónindegi jumysty jalǵastyrýǵa daıynbyz», — dep atap ótti QR SIM Tehnıkalyq retteý jáne metrologııa komıteti tóraǵasynyń orynbasary Qaısar Shalabaev.

Aıta keteıik, Tehnıkalyq retteý jáne metrologııa komıteti sáıkestikti baǵalaý rásimderin tsıfrlandyrý jáne jetildirý jónindegi júrgizip jatqan jumys «sur» sertıfıkattardy joıýǵa jáne sáıkestikti baǵalaý rásiminiń ashyqtyǵyn qamtamasyz etýge, sondaı-aq Qazaqstan halqyn qaýipsiz jáne sapaly ónimmen qamtyp, tehnıkalyq kedergilerdi azaıtýǵa baǵyttalǵan.