Tehnıkalyq reglamentterge saı kelmeıtin 200 mln. teńgege jýyq qarjynyń azyq-túlik ónimderi ótkizilmeıtin boldy
ASTANA. 18 qazan. QazAqparat - Azyq-túlik ónimderin satatyn kásiporyndardaǵy tekseristiń nátıjesinde 382 jaǵdaı boıynsha zańnama talaptaryn buzý faktileri anyqtaldy.
Bul týraly búgin Astanada 9 aıdaǵy memlekettik qadaǵalaý qorytyndysyna arnalǵan brıfıngte QR Indýstrııa jáne jańa tehnologııalar mınıstrligi Tehnıkalyq retteý jáne metrologııa komıtetiniń tóraǵasy Ryskeldi Sátbaev aıtty.
«Azyq-túlik ónimderin satatyn kásiporyndarda 581 tekseris júrgizilip, onyń nátıjesi boıynsha 382 jaǵdaıda zań buzýshylyqtar anyqtaldy. Bul óz kezeginde 65,7 paıyzdy qurap otyr»,-dedi ol.
Komıtet basshysynyń aıtýynsha, tekseris qorytyndysy aıasynda jalpy somasy 195 mln. teńgeden astam qarjyǵa sertıfıkatsyz, tehnıkalyq reglamentterge saı kelmeıtin 3 411 ónim toptamasyn ótkizýge tyıym salynǵan.
«Zańnama talaptaryn oryndamaǵandar 19 mln. teńgeden astam qarjyǵa ákimshilik jaýapkershilikke tartyldy»,-dep túıdi ol.
