Tehnıkalyq qarasoramen emdeý ádisi otandyq medıtsınaǵa qalaı engiziledi
NUR-SULTAN. QazAqparat - Izraılden kelgen medıtsına ǵylymdarynyń doktory Ronen Shemesh óz elinde jolǵa qoıylǵan tehnıkalyq qarasoramen emdeý ádisiniń jetistikterimen bólisti, dep habarlaıdy QazAqparat tilshisi.
«Jalpy, Jambyl oblysynyń Shý óńirinde ósetin qarasora - bul ósimdiktiń jabaıy túrine jatady. Ony eshqandaı maqsatta qoldanýǵa bolmaıdy. Biz de álbette, ony medıtsınalyq maqsatta qoldanbaımyz. Ekinshiden, Shýda ósip jatqan qarasora - onkologııalyq aýrýlardy emdeýge baǵyttalatyn qarasoranyń saıma-saı sorty emes. Onkologııalyq aýrýlardy emdeýge arnalǵan qarasoranyń tıisti sorty AQSh-ta, Izraıl men Kanadada ósiriledi», - deıdi «RAIS Medicann International» kompanııasynyń bas dırektory Zamık Rahımov Nazarbaev Ýnıversıtetiniń Medıtsına mektebinde ótken Tehnıkalyq qarasorany medıtsınalyq maqsatta paıdalaný boıynsha jahandyq forýmda.
Onyń aıtýyna qaraǵanda, damyǵan elderde tehnıkalyq qarasorany óńdep, dári retinde shyǵarý kezinde onyń quramynda narkotıkalyq quram bolmaý kerek.
«Mine, sondyqtan, Qazaqstanda da aldaǵy ýaqytta tehnıkalyq qarasorany óńdeıtin bolsaq, quramynan tetragıdrokannabınoldy (TGK) ajyratyp, qalǵan maıy patsıentterdi emdeýge paıdalanylady. Biz paıdalanǵaly otyrǵan qarasoranyń «ındıka» sortynda kanabınoıdtyń mólsheri 8 paıyz ǵana. Demek, biz maıdy ázirlep, memleketke laboratorııalar arqyly barynsha tekserýge jiberemiz. Eger laboratorııa osy medıtsınalyq ónimniń quramynda eshqandaı narkotıkalyq quram bolmaǵanyn anyqtasa, Densaýlyq saqtaý mınıstrligi men ІІM-niń baqylaýymen patsıentter qaıtadan bizge keletin bolady», - deıdi Zamık Rahımov.
Al Izraılden kelgen medıtsına ǵylymdarynyń doktory, genetıka salasyndaǵy zertteýshi jáne jańa dárilik zattardy zertteý men ázirleý jónindegi sarapshy Ronen Shemeshtiń aıtýynsha, Izraılde sońǵy 20 jylda qaterlik isikten keletin ólim jaǵdaıy 25 paıyzǵa tómendegen.
«Izraılde tehnıkalyq qarasora aýrýdyń 101 túrin emdeýge paıdalanylady. Olardyń qataryna tynys joldarynyń obyry, dıabet, psorıaz sekildi aýrýlardy jatqyzýǵa bolady. Tehnıkalyq qarasorany paıdalanýdyń basty tájirıbesi ótken ǵasyrdyń alpysynshy jyldardan beri Izraılden bastaý alyp jatqanyn atap ótkim keledi. Tehnıkalyq qarasoranyń obyr jasýshalaryn jeńetini dáleldengen. Qarasorany paıdalaný aǵzanyń qınalyp aýyrýyn azaıtady. Qarasora psıhologııalyq turǵyda da patsıentterge óte paıdaly. Jalpy, onkologııalyq aýrýlardy emdeýde tehnıkalyq qarasorany paıdalaný hımııaterapııamen qatar qoldanylady», - deıdi Ronen Shemesh.
Eske sala ketsek, elimizde onkologııalyq aýrýlardy, astma men dıabetti, parkınson aýrýlaryn tehnıkalyq qarasoramen emdeý ádisi jolǵa qoıylady.
