Tehnıkalyq baıqaý ortalyqtaryna qoıylatyn talaptar kúsheıdi

NUR-SULTAN. QazAqparat – «Ulttyq aqparattyq tehnologııalar» AQ basqarma tóraǵasynyń orynbasary Dáýlet Bekmanov Qazaqstanda tehnıkalyq baıqaý ortalyqtaryna qoıylatyn talaptar kúsheıgenin málim etti, dep habarlaıdy QazAqparat tilshisi.

«Elimizdegi tehnıkalyq baıqaý ortalyqtarynyń jumysyn qamtıtyn baǵdarlamanyń talaptaryn osy jyldyń shildesinde bekitken edik. Al negizi bul talap 2017 jyly engizilgen. Áıtse de, tehnıkalyq baıqaý ortalyqtary ol talaptardy eskermeı keldi. Basty talap – kólik tehnıkalyq baıqaý ortalyǵyna kirgen kezde-aq barlyq málimet avtomatty túrde júıege engizilýi tıis. Osy talapqa saı keletin baǵdarlama boıynsha jumys isteıtin 160 ortalyqtyń júıege kiretin kilti qaıtaryp alyndy. Olar endi baǵdarlamalaryn jetildirip, qaıta jumysqa kirisýi tıis», - dedi Dáýlet Bekmanov elordada ótken baspasóz máslıhatynda.

Onyń aıtýyna qaraǵanda, tehnıkalyq baıqaý ortalyqtary bes túrli baǵdarlama boıynsha jumys júrgizeli. Sonyń úsheýi ǵana tekserýden ótkeni habarlanyp otyr.

«Al kóliktiń memlekettik tirkeý nómirin anyqtaı almaıtyn júıesi bar 2 reseılik baǵdarlama tekserýden ótpedi. Baǵdarlamany jasaǵan kompanııa anyqtalǵan kemshilikterdi joıýdy ýáde etip otyr. Qosymsha tekserýden keıin ol baǵdarlama da júıege engizilýi múmkin», - dedi ol.

Al QR IIDM Kólik komıteti tóraǵasynyń orynbasary Danııar Qospabaevtyń aıtýynsha, Qazaqstanda quramynda myńǵa tarta tehnıkalyq baıqaý ortalyǵy bar 645 operator jumys isteıdi.

«Jyl saıyn tehnıkalyq baıqaýdan 2 mln kóliktiń 1,8 mıllıony ótedi. ıAǵnı, kólikterdiń 5 paıyzy ótpeı qalyp jatyr», - dedi ol.