Tehnıkalyq aqaýdan grantqa ilinbeı qalǵan shymkenttik talapkerdiń máselesi sheshildi

NUR-SULTAN. QazAqparat – Tehnıkalyq qatelik tez arada túzetilip, talapkerge ýnıverısıtet granty bólinetin boldy. Mınıstrdiń keńesshisi túlektiń ata-anasymen sóılesip, ketken qatelik úshin vedomtsvo atynan keshirim surady, dep habarlaıdy QazAqparat Ǵylym jáne joǵary bilim mınıstrliginiń baspasóz qyzmetine silteme jasap.

«Mektep túlegi Tastan Jasmın Qýanyshqyzy memlekettik bilim grantynyń konkýrsyna qatysý úshin M. Áýezov atyndaǵy Ońtústik Qazaqstan ýnıversıtetine qujat tapsyrǵan. Qabyldaý komıssııasynyń mamany UBT sertıfıkattaryn tańdaý kezinde tehnıkalyq qatelik jiberip alǵan. Osydan keıin grant ıegerleriniń tizimi jarııalanǵanda balasynyń oqýǵa túspegenin bilgen ata-ana atalǵan oqý ornynyń basshylyǵyna, mınıstrlikke aryzdandy.

Ǵylym jáne joǵary bilim mınıstrligi ókilderi búgin bul máseleni nazarǵa alyp, shuǵyl sheshim qabyldady. Mınıstrdiń keńesshisi túlektiń ata-anasymen sóılesip, ketken qatelik úshin mınıstr men mınıstrliktiń atynan keshirim surady. Tez arada tehnıkalyq qatelik túzetilip, talapker Tastan Jasmın Qýanyshqyzy úshin Súleımen Demırel atyndaǵy ýnıverısıtetke grant bólinetin boldy. Sondaı-aq, ol jataqhanamen qamtylady.

Al, qujat qabyldaýda qatelik jibergen M. Áýezov atyndaǵy Ońtústik Qazaqstan ýnıversıteti qabyldaý komıssııasynyń mamanyna «sógis» berildi.

Ǵylym jáne joǵary bilim mınıstri Saıasat Nurbek apparat basshylaryna jáne Joǵarǵy oqý oryndary rektorlaryna talapkerlerdiń qujattaryn qabyldaý barysynda muqııat bolýdy eskertti», - delingen resmı habarlamada.