Tehnıkalyq jáne kásiptik bilim berýdi transformatsııalaý: 20 óńirde IT-ortalyqtar iske qosylady
ASTANA. KAZINFORM – Stýdentterdiń múmkindikterin keńeıtý jáne biliktiligin arttyrý maqsatynda kolledjder bazasynda óńirlik IT-ortalyqtar qurylyp jatyr. Bul ekonomıkanyń tsıfrlyq transformatsııasy men IT-mamandarǵa suranystyń ósýi jaǵdaıynda asa ózekti bolyp otyr. Bul týraly QR Oqý-aǵartý mınıstrligi málim etti.
Búginde Pavlodar aqparattyq tehnologııalar kolledjinde «IT HUB / JYLYJAI10 IT» óńirlik IT ortalyǵy tabysty júzege asyrylýda, munda «Robototehnıka», «Grafıkalyq dızaın» jáne «3D-prototıpteý» baǵyttary boıynsha bilim berý kýrstary júrgiziledi.
Ortalyqta 3D-prototıpteý, jelilik ákimshilendirý, veb-dızaın, vırtýaldy jáne keńeıtilgen shyndyq zerthanalaryn qosa alǵanda 10-nan astam mamandandyrylǵan zerthanalar bar. Sonymen qatar baǵdarlamalyq qamtamasyz etý, veb-saıt qurý jáne óndiristik prototıpter boıynsha aqyly qyzmetter usynylady. Ortalyqta sondaı-aq stýdentterdi WorldSkills jáne JuniorSkills chempıonattaryna daıyndaıdy.
«Óńirlik IT-ortalyqtar kolledj stýdentterine eńbek naryǵynda suranysqa ıe zamanaýı tehnıkalyq daǵdylardy ıgerýge, sondaı-aq ozyq bilim berý resýrstary men baǵdarlamalaryna qol jetimdilikti qamtamasyz etýge yqpal etedi. Bul ınnovatsııalyq jobalardy damytý, IT-kompanııalarmen jáne halyqaralyq seriktestermen yntymaqtastyq qurý baǵytynda qosymsha múmkindikterge jol ashady», – dep atap ótti Tehnıkalyq jáne kásiptik bilim departamenti dırektorynyń orynbasary Aqzıra Qasymova.
Taǵy 20 IT-ortalyqtyń ashylýy josparlanýda, onyń ishinde Almatydadaǵy IT HUB Almaty Polytechnic College óz jumysyn osy jyldyń qarasha aıynda bastaıdy.
