Tehnıkalyq jáne kásiptik bilim berý uıymdaryna qujat qabyldaý bastaldy

ASTANA. KAZINFORM – 25 maýsymnan bastap Qazaqstanda tehnıkalyq jáne kásiptik, orta bilimnen keıingi bilim berý uıymdaryna qujat qabyldaý bastaldy.

QR Oqý-aǵartý mınıstrliginiń baspasóz qyzmeti málimetinshe, 2025 - 2026 jańa oqý jylynda grant negizinde 150 myń talapkerdi qabyldaý josparlanyp otyr.

Memlekettik bilim berý tapsyrysy (granttar) geologııa, mashına jasaý, energetıka, IT, metallýrgııa, kólik jáne taǵy da basqa tehnıkalyq mamandyqtar boıynsha artty. Qujattardy elektrondyq úkimet portaly egov.kz arqyly nemese kolledjge baryp tapsyrýǵa bolady.

Talapkerlerge 4 mamandyq pen 4 kolledjdi tańdap, bir ýaqytta qujat tapsyrý múmkindigi berilgen. Orta býyn jáne qoldanbaly bakalavrıat mamandyqtaryna túsý úshin baıqaý mindetti jáne beıindik pánder boıynsha attestattyń ortasha baly negizinde ótkiziledi. Jumysshy biliktiligin alǵysy keletin túlekter kolledjge áńgimelesý nátıjesi boıynsha qabyldanady.

Pedagogıkalyq mamandyqtarǵa túsýshiler úshin esse nemese dıktant, al medıtsınalyq mamandyqtar boıynsha beıindik emtıhandar ótkiziledi. Orta býyn mamandyqtary boıynsha (9 jáne 11-synyp) qujat qabyldaý 25 maýsym men 22 tamyz aralyǵynda ótedi. Shyǵarmashylyq mamandyqtar boıynsha — 25 maýsymnan 20 shildege deıin. Pedagogıkalyq jáne medıtsınalyq mamandyqtar boıynsha — 25 maýsymnan osy jyldyń 10 tamyzyna deıin.

Sondaı-aq kolledjge qabyldaý kezinde QR Oqý-aǵartý mınıstriniń 2023 jylǵy 15 tamyzdaǵy №261 buıryǵyna sáıkes kvota kózdelgen. Buıryqtyń tolyq mátinimen «Ádilet» quqyqtyq portalynda tanysýǵa bolady.

Buǵan deıin JOO-ǵa qujat qashan qabyldanatyny belgili bolǵan edi.