Tehnıkalyq jáne kásibı bilim berýde onlaın oqytý engiziledi

Qazaqstan kolledjderindegi oqytý baǵdarlamalaryna onlaın oqytý formasy engiziledi. Bul týraly QR Oqý-aǵartý vıtse-mınıstri Edil Ospan aıtty, dep habarlaıdy Kazinform.

Búgin Májiliste Oqý-aǵartý vıtse-mınıstri «Qazaqstan Respýblıkasynyń keıbir zańnamalyq aktilerine bilim berý jáne bala quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasyn tanystyrdy.

«Onlaın bilim berý álemdik naryǵy belsendi ósip kele jatqan sala. Onlaın oqytýdy engizý kolledjderdiń básekege qabiletin arttyrýǵa, utqyrlyq pen joǵary nátıjege qol jetkizýge, al stýdentterge jumys ornynda oqý arqyly ýaqyt pen shyǵyndardy únemdeýge múmkindik beredi», - dedi Edil Ospan Májiliste.

Sondaı-aq Oqý-aǵartý mınıstrligi tehnıkalyq jáne kásiptik bilim berýde akademııalyq utqyrlyq qaǵıdatyn engizýdi usynyp otyr. Mundaı qaǵıdat joǵarǵy oqý oryndarynda júzege asyrylady, qazirgi ýaqytta «jas maman» jobasy aıasynda eldegi 180 kolledj zamanaýı jabdyqtarmen jabdyqtalǵan, onda 212 quzirettilik ortalyqtary jumys isteýde.

«Akademııalyq utqyrlyqty engizý – basqa kolledj stýdentterine elimizdegi jáne shetelderdegi zamanaýı jabdyqtalǵan kolledjderde ınfraqurylymǵa, tehnologııalarǵa jáne bilim alý quraldaryna erkin qol jetkizýge múmkindik beredi. Nátıjesinde olar jeke bilim berý traektorııasyn tańdaýǵa, sapaly bilim berý qyzmetterin alýǵa múmkindik bar», - dedi spıker.

Buǵan deıin Edil Ospan balalardy asyrap alatyn kásibı otbasy ınstıtýty engiziletinin aıtqan edi. Asyrap alýshy ata-analardyń jasy 30-53 aralyǵynda bolady, balany qabyldaıtyn kásibı otbasy mártebesin alýǵa úmitker otbasylar psıhologııalyq daıarlyqtan jáne qamqorshylyq jáne qorǵanshylyq organdarda akkredıtteýden ótedi.

Sondaı-aq Qazaqstanda áleýmettik osal otbasynan shyqqan, jeke menshik mektepte oqıtyn 25 myń bala áleýmettik qoldaýdan tys qalyp otyr. Endi jeke menshik mekteptegi balalarǵa da áleýmettik kómek beriledi.