Tehnıkalyq mamandyqtardyń bedelin kóteremiz – Premer-mınıstr

ASTANA. KAZINFORM — Óndiristik qýattardyń keńeıýi tehnıkalyq mamandarǵa degen suranysty arttyra túsedi. Bul týraly Úkimettiń keńeıtilgen otyrysynda Premer-mınıstr Oljas Bektenov óńirderdiń ekonomıkalyq ósimine túsinik berdi.

- Іri kásiporyndar shaǵyn jáne orta bıznesti ózine tartatyn ónerkásiptik alańdarǵa aınalýda, ShOB-ty qoldaý Úkimet jumysynyń basymdyǵy bolyp qala beretini anyq. Óndiristik qýattardyń keńeıýi tehnıkalyq mamandarǵa degen suranysty arttyra túsedi. Jarııalanǵan «Jumysshy mamandyqtary jyly» aıasynda kásiptik tehnıkalyq bilim berýdiń sapasyn jáne tehnıkalyq mamandyqtardyń bedelin kóteretin bolamyz. Suranysqa ıe tehnıkalyq mamandar úshin jeńildetilgen ıpotekalyq jáne arendalyq turǵyn úı baǵdarlamalary iske qosyldy, - dedi Úkimet basshysy.

Budan buryn habarlanǵandaı, 2024 jyly ekonomıka 4,8 paıyzǵa ósti. Aýyl sharýashylyǵynda 13,7 paıyz, qurylysta — 13,1, saýdada — 9,1, kólik salasynda 8,5 paıyz deńgeıinde ósimge qol jetkizildi. Óńdeý ónerkásibiniń kólemi 5,9 paıyzǵa ulǵaıdy. Agrarlyq sektor men óńdeýshi salada sońǵy 10 jyl ishindegi eń qarqyndy ósim tirkeldi.

Sonymen qatar, premer-mınıstr túrli salalardaǵy negizgi kórsetkishterdi málim etken bolatyn. Sondaı-aq, Úkimet otyrysynda eń joǵary jáne tómen ekonomıkalyq ósim kórsetken óńirler týraly aıtylǵan edi.