Tehnıkalyq qaýipsizdik basty nazarda - «QazaqGaz» UK» AQ Basqarma tóraǵasy
Astanada bıyl tabıǵı gazdy tutyný kólemi 1,5 ese ósti. Jańadan eki gazben jylytý ortalyǵy salyndy jáne turǵyndar gazǵa úılerin kóptep qostyra bastady. Sáıkesinshe, kógildir otyn qural-jabdyqtaryn paıdalanýǵa qatysty táýekelder de artady. Bul týraly «QazaqGaz» UK» AQ Basqarma tóraǵasy Sanjar Jarkeshov aıtty.
«QazaqGaz» UK» AQ press-týr uıymdastyryp, BAQ ókilderine gaz qurylǵylaryn qaýipsiz paıdalanýdyń mańyzdylyǵyn túsindirdi.
Qazir gaz qubyry tartylǵan kóshelerdegi abonentterdiń 80 paıyzy gazǵa qosylǵan. Onyń teń jartysy jeke turǵyn úı bolsa, qalǵany kommertsııalyq núkteler. 2021 jyldan beri 10 040 jeke turǵyn úı gazǵa qosylǵan, bul 47 myńdaı adam kógildir otynnyń qyzyǵyn kórip otyr degen sóz.
Mamandar gazdy jetkizýde tehnıkalyq qaýipsizdik sharalaryn barynsha saqtadyq dep otyr. Óıtkeni gaz qalaǵa joǵary qysymmen keledi. Sońǵy tutynýshyǵa jetkizilgenge deıin gazdyń qysymy barynsha tómendetilip, birneshe shaǵyn stantsııadan ótedi. Munyń barlyǵy gaz apatyn boldyrmaý úshin jasalǵan.
Eldiń batysynan Astanaǵa deıin jetkizilgen gaz magıstralinen qalaǵa tabıǵı gazdy kirgizýmen «QazTransGaz Aımaq» AQ aınalysyp jatyr. Olar gazdy barlyq tehnıkalyq talapty saqtaı otyryp, kóshe boıymen tartylǵan qubyrlar arqyly jeke úıdiń janyna deıin ákelip beredi. Ári qaraı jeke kompanııalar gazdy úıge kirgizýmen aınalysady. Bar olqylyq osy jerde bastalatyn kórinedi. Óıtkeni isine salǵyrt qaraıtyn keıbir jeke kompanııalar tehnıkalyq talaptardy saqtamaıdy, saldarynan túrli qaıǵyly oqıǵalar bolady.
Press-týr barysynda gaz mamandary jeke kompanııalardyń qandaı quıtyrqylyqqa baratynyn kórsetti. Ózimiz barǵan qaladaǵy bir jeke turǵyn úı jeke kompanııany jaldap, úıine gaz qostyrypty. Alaıda jeke merdiger úıdiń janynan japsarlaı salynǵan kommertsııalyq nysandy da sol bir núkte arqyly qosqan. Mamandar mundaı jaǵdaıda úı ıesi eki ruqsat alý qajettigin aıtady. ıAǵnı, kommertsııalyq maqsattaǵy nysanǵa jekeleı ruqsat alýy kerek bolǵan. Biraq úıine gaz qosyp bergen jeke kompanııa, ol abonentke eshteńe túsindirmesten bir núkte arqyly qosyp bergen. Sonyń saldarynan bul úı gazdan ajyratyldy. Endi jeke kompanııaǵa aıyppul salynbaq.
Qazir Astanada gazdy úıge kirgizý quny orta eseppen - 720 myń teńge shamasynda. Oǵan gaz peshinen bastap, barlyq montaj jumysy kiredi.
«QazTransGaz Aımaq» AQ Bas dırektory Baýyrjan Asqarov qaladaǵy gaz tarıfin memleket bekitetinin aıtady. Ol ár óńirde ártúrli. Gaz eldiń batysynda óndiriletindikten ol jaqta arzan, al Astanada gaz baǵasynyń 1 tekshe metri - 38 teńge.
«Osy kúnge deıin Astanadaǵy jeke turǵyn úılerdiń 10 040-y gazǵa qosyldy, bul 47 myńdaı adam. 2026 jylǵa deıin qala tolyǵymen gazǵa qosylady. Jalpy qalada gazǵa qosylatyn 21 myńdaı abonent bar, olardyń jartysyn qosyp úlgerdik», - deıdi Baýyrjan Asqarov.
Mamandar kóshe boıyndaǵy gaz qubyrynda aqaý bolsa, ony «Pergam» jyljymaly stantsııanyń kómegimen anyqtaı alatyndaryn aıtady. Bul - 30-150 metr radıýstegi gazdyń ıisin tez anyqtaı alatyn apparat. Aqaý shyqqan jerden aýaǵa gaz tarap jatqanyn anyqtaıtyn kúrdeli apparat kólikke ornatylǵan jáne gaz qaı jerden shyǵyp jatqanyn belgi arqyly kórsetip turady.
«QazaqGaz» UK» Basqarma tóraǵasy Sanjar Jarkeshov gaz tartylǵan jerde óndiris te damı túsetinin aıtady.
«Kóptegen ınvestor qandaı da bir jobany bastamas buryn «bul jerde gaz bar ma» dep suraıtyn boldy. ıAǵnı, olar gaz bar jerde óndiris oryndaryn ashyp, ınvestıtsııa salýǵa ázir. Sol sebepti biz Prezıdenttiń tikeleı tapsyrmasymen gaz tasymaldaý júıesine modernızatsııa jasap, 400 mlrd teńge óz qarjymyzdy jumsadyq. Ol degenińiz - Beıneý-Jańaózen, Jańaózen-Jetibaı-Aqtaý, Atyraý oblysyndaǵy Maqat, Astana men Almatydaǵy JEO-yn gazdandyrý jobalary. Oǵan qosa halqymyz úshin gaz baǵasyna 389 mlrd teńge sýbsıdııa jasadyq. Sondaı-aq Qashaǵan men Qarashyǵanaqta jańa gaz óńdeý zaýyttary salynyp jatyr», - dedi Sanjar Jarkeshov.
«QazaqGaz» UK» AQ-y bıyl elimiz boıynsha 600 myńǵa jýyq adamdy gazben qamtyǵan, onyń negizgi bóligi Túrkistan oblysynda ekenin aıta keteıik.
