Tehnıkalyq-kásiptik bilim berý júıesin túbegeıli jańǵyrtý kerek — Toqaev

ASTANA. KAZINFORM — Tehnıkalyq jáne kásiptik bilim beretin uıymdarǵa memlekettik tapsyrys kólemi artady jáne bıyl bıýdjetten qosymsha 22 mıllıard teńge bólinedi. Bul týraly Prezıdent Qasym-Jomart Toqaev Úkimettiń keńeıtilgen otyrysynda pikir bildirdi.

— Jumysshy mamandyqtar jyly mańyzdy is-sharalar men jobalar júzege asyrylady, eńbek adamynyń abyroı-bedelin arttyrý úshin naqty jumys júrgiziledi. Tehnıkalyq jáne kásiptik bilim berý júıesin túbegeıli jańǵyrtý isin bastaý kerek. Jaýapty mekemeniń bári jáne eń bastysy, jeke sektor bul iske belsene aralasýǵa tıis, — dedi Q. Toqaev.

Bıznestiń bul salaǵa kóbirek kelýi úshin tehnıkalyq jáne kásiptik bilim beretin uıymdarǵa arnalǵan memlekettik tapsyrys kólemi artady.

— Onyń mólsheri de birkelki bolady. Buǵan bıyl bıýdjetten qosymsha 22 mıllıard teńge bólinedi. Bul rette ákimderge zor jaýapkershilik júkteledi. Olar kásipkerlermen birlesip, aımaqqa qajetti mamandyqtar tizimin anyqtaýy kerek. Sondaı-aq suranysqa ıe kadrlar daıarlaý úshin kolledjderge baǵyt-baǵdar berýi qajet, — dep tolyqtyrdy Prezıdent.

Sondaı-aq, ǵylym jáne joǵary bilim salasyndaǵy reformalardyń qarqyny men sapasyn saqtaý mańyzdy. Bilim berý tapsyrysyn oqý oryndarynyń reıtıngine qaraı bólý jumysy Úkimettiń baqylaýynda bolýǵa tıis.

— Sońǵy jyldary memleket ǵylymǵa bólinetin qarajat kólemin edáýir arttyrdy. Áli de arttyra beredi. Biraq bul qarjy naqty maqsatqa saı jumsalýy qajet. Bıýdjet qarjysyn sapaly ári suranysqa ıe zertteýler júrgizetin ýnıversıtetter, ınstıtýttar men ǵalymdar ǵana alýy kerek, — dedi Qasym-Jomart Toqaev.

Buǵan deıin Prezıdent MÁMS júıesin reformalaýdy jalǵastyrý kerek ekenin aıtyp ótti.

Sonymen qatar Memleket basshysy alǵashqy AES qurylysyn tezdetý qajet ekenin alǵa tartty.