Tehnıkalyq baıqaý: qyzmet baǵasy qansha jáne júrgizýshiler neni bilýi kerek

Zań talaptary

Tehnıkalyq baıqaýdan ótkizý tártibi QR «Jol júrisi týraly» Zańynda kórsetilgen. Zańnyń 88-babyna sáıkes, kólikti tehnıkalyq baıqaýdan ótkizý úshin kólik quralynyń ózi jáne memlekettik tirkeý týraly kýálik qajet. Kóliktiń qaıda tirkelgeni mańyzdy emes. Mańyzdysy, kólikti kez kelgen tehnıkalyq baıqaý ortalyǵyna aparyp, teksertip alýǵa bolady.

Jeńil avtokólikterge qatysty mańyzdy jaıtty este ustańyz. Eger kóliktiń shyǵarylǵanyna 7 jyldan assa jáne ol zańdy tulǵaǵa tıesili bolmasa, ár 12 aı saıyn tehnıkalyq baıqaýdan ótkizý qajet. Al zańdy tulǵanyń atyna tirkelgen avtokólikterdi óndirilgen jylyna qaramastan, ár 6 aı saıyn tehnıkalyq baıqaýdan ótkizý mindetteledi. Taksı, avtobýs jáne marshrýttyq taksı de jylyna eki ret tekseriledi.

Tehnıkalyq dıagnostıka kezinde ne tekseriledi?

Tehnıkalyq baıqaý kezinde mamandar avtokólikti qaýipsiz paıdalanýǵa áser etetin negizgi júıeni, bólshekterdi tekseredi. Teksergen kezde aqaý anyqtalmasa, tehnıkalyq baıqaý ortalyǵy berilgen qorytyndy úshin jaýapty bolady.

Mindetti túrde tekseriletin negizgi kórsetkishter:

• Tejeý júıesi: tejegishtiń jumys isteýi, tejeý tıimdiligi jáne dóńgelekter arasyndaǵy tejeý kúshiniń aıyrmashylyǵy;
• Rýldik basqarý jáne aspa júıesi: rýldiń myqtylyǵy, rýldik basqarý tetikteri men aspa bólshekteriniń jaramdylyǵy, júris bóliginiń jaǵdaıy;
• Syrtqy jaryq qurylǵylary: sham, burylys kórsetkishi, tejegish shamdary, artqy shamdar jáne jaryqtyń durys rettelýi;
• Dóńgelek: dóńgelektiń belgilengen talapqa sáıkestigi, protektordyń kúıi jáne qaýipti zaqymnyń bolmaýy;
• Qozǵaltqysh pen shyǵarý júıesi: zııandy shyǵaryndy deńgeıi, tıisti júıeniń germetıkalyǵy jáne dıagnostıka ádistemesinde kózdelgen basqa da kórsetkishter;
• Qaýipsizdiktiń ózge de elementteri: qaýipsizdik beldigi, áınek tazalaǵysh, júrgizýshiniń kórý múmkindigi, aına, dybys sıgnaly jáne ádistemede kózdelgen basqa da bólshekter.

Tehnıkalyq baıqaýdan ótpegen jaǵdaıda ne bolady?

Eger avtokólikten zańda tyıym salynatyn aqaý anyqtalsa, tehnıkalyq baıqaýdan ótpegen bolyp esepteledi. Kólik ıesine anyqtalǵan buzýshylyqtar kórsetilgen dıagnostıkalyq karta beriledi.

Jóndeý jumystary aıaqtalǵannan keıin avtokólikti qaıta teksertýge bolady. Júrgizýshi burynǵy tehnıkalyq baıqaý ortalyǵyna qaıta barsa, mamandar aldyńǵy tekserý kezinde belgilengen talaptarǵa sáıkes kelmegen kórsetkishterdi ǵana qaıta qaraıdy.

Aıta keteıik, tehnıkalyq baıqaý ortalyǵynyń aýmaǵynda kólik quralyn jóndeýge jáne tehnıkalyq qyzmet kórsetýge ruqsat joq. Sondyqtan aqaý anyqtalǵan jaǵdaıda avtokólikti jóndetý úshin tehnıkalyq qyzmet kórsetý ortalyǵyna barýǵa týra keledi.

2026 jyldyń 19 qazannan bastap tsıfrlyq tirkeý júrgiziledi. Dıagnostıkalyq karta elektrondy túrde rásimdelip, tekserý málimetteri biryńǵaı tsıfrlyq júıege jiberiledi. Tehnıkalyq baıqaýdan ótkennen keıin ýaqyty jáne jaramdylyq merziminiń aıaqtalatyn kúni eGov júıesindegi jeke kabınette kórsetiledi.

Tehnıkalyq baıqaýdan ótý merzimi saqtalmasa, aıyppul qarastyrylǵan. QR Ákimshilik quqyq buzýshylyq týraly kodeksiniń 590-babynyń 9-tarmaǵyna sáıkes 5 aılyq eseptik kórsetkish (AEK) mólsherinde aıyppul salynady. Qazirgi ýaqytta bul — 21 625 teńge. Bir jyl ishinde qaıtalansa, aıyppul 20 AEK-ke, ıaǵnı 86 500 teńgege deıin ósedi.

Tehnıkalyq baıqaýdan ótý jáne onyń baǵasy

Avtokólikti Qazaqstannyń kez kelgen tehnıkalyq baıqaý pýnktinde teksertýge bolady. Elimizdiń qalalarynda mundaı ortalyqtar jetkilikti. Tekserý rásimi shamamen 15 mınýtqa sozylady.

Tehnıkalyq baıqaý — aqyly qyzmet. Onyń quny kólik quralynyń túrine baılanysty. Jeńil avtokólikti teksertý arzan bolsa, júk kólikterin tehnıkalyq baıqaýdan ótkizý baǵasy joǵary.

Eń tómen baǵa Oral men Qaraǵandyda tirkeldi. Bul qalalarda qyzmet quny 3 000 teńgeden bastalady.

Odan keıin Petropavl, Pavlodar jáne Taldyqorǵan qalalary ornalasqan. Munda tehnıkalyq baıqaý baǵasy 4 000 teńgeden bastalady.

Aqtaý, Jezqazǵan, Kókshetaý jáne Astana qalalarynda tehnıkalyq baıqaýdan ótý quny 5 000 teńgeden bastalyp tur. Shymkent pen Óskemende qyzmet baǵasy 6 000 teńge jáne odan joǵary.

Taraz, Qostanaı, Qyzylorda, Atyraý, Semeı jáne Almaty qalalarynda tehnıkalyq baıqaýdyń eń jıi kezdesetin baǵasy — 7 000 teńge.

Qyzmet quny joǵary qalalar — Aqtóbe men Túrkistan. Munda tehnıkalyq baıqaýdan ótý quny 8 000 teńgeden bastalady.

Jol-kólik oqıǵasynan keıin saqtandyrý tólemi qalaı beriledi?

21 qazannan bastap Qazaqstanda jol apatynan keıingi saqtandyrý tólemderi tek bank shotyna aýdarylady. Saqtandyrý kompanııasynyń kassasynan qolma-qol aqsha alý múmkin bolmaıdy. Jańa tártip nelikten engizilip jatyr jáne saqtandyrý kompanııasy tıisti somadan az tólese, ne isteý kerek? Bul týraly zań keńesshisi Arys Danaǵatov Kazinform tilshisine aıtyp berdi.