Tehnıkalardy ımporttaýshylardan túsken kádege jaratý tólemderi qaıda jumsalady
ASTANA. KAZINFORM — Kólik quralary men aýyl sharýashylyǵy tehnıkalaryn ımporttaýshylardan túsken kádege jaratý tólemderi qaıda jumsalady? Májilis depýtattarynyń osy saýalyna Premer-Mınıstr Oljas Bektenov jaýap berdi.
— Ekologııa kodeksine sáıkes, otandyq kólik quraldary men aýyl sharýashylyǵy tehnıkasyn óndirýshiler tólegen kádege jaratý tólemi qatań túrde 14 baǵyt boıynsha jumsalady. Kólik quraldaryn, aýyl sharýashylyǵy tehnıkasyn jáne ózge de taýarlardy ımporttaýshylar kodekske sáıkes jáne 2021 jylǵy 2 qyrkúıektegi № 604 Úkimet qaýlysy negizinde tólegen 339,5 mlrd teńge mólsherindegi qarajat «Ónerkásipti damytý qory» AQ arqyly qorshaǵan orta men ekologııany qorǵaýǵa baǵyttalǵan mindetterdi sheshýge jiberiledi, — dedi Úkimet basshysy jaýabynda.
Premer-Mınıstr jaýabyna qosymsha berilgen anyqtamaǵa qaraǵanda atalǵan qarajat mynalarǵa jumsalady:
— orman órtiniń aldyn alý jáne olardy sóndirý úshin órt sóndirý tehnıkasyn satyp alýǵa — 35 mlrd teńge (196 birlik órt sóndirý tehnıkasy);
— TJM jáne SRIM úshin tehnıka satyp alýǵa — 50 mlrd teńge (700 birlik arnaıy tehnıka);
— qatty turmystyq qaldyqtar jobalaryna — 42,5 mlrd teńge (9 joba);
— otandyq óndiristiń jeńil kólik quraldaryn satyp alý úshin jeke tulǵalardy jeńildikti avtonesıeleýge — 100 mlrd teńge (13 347 birlik);
— otandyq aýyl sharýashylyǵy tehnıkasynyń jeńildikti lızıngine– 50 mlrd teńge (1 729 birlik);
— Avtomobıl joldaryn basqarý jónindegi ulttyq operatordyń otandyq óndiristiń jol-paıdalaný tehnıkasyn satyp alýǵa — 17 mlrd teńge (381 birlik);
— otandyq avtobýstardyń jeńildikti lızıngine — 45 mlrd teńge (1432 birlik).
— Budan basqa, atalǵan qarajat esebinen qaldyqtardy jınaý, tasymaldaý jáne qaıta óńdeý boıynsha «EcoQolday» baǵdarlamasy iske qosyldy. QTQ polıgondaryn salý boıynsha jobalar iske asyrylýda. Osylaısha, kádege jaratý tólemderin tóleýdiń qoldanystaǵy tetigi óziniń tıimdiligin kórsetti jáne qorshaǵan orta men ekologııany qorǵaýǵa baǵyttalǵan, — dedi Oljas Bektenov.
Buǵan deıin Úkimet qaldyqtardyń barlyq túrin basqarý tujyrymdamasyn ázirleıtinin,
kádege jaratý tólemderi óńirlerde qatty turmystyq qaldyqtar polıgondaryn salýǵa jumsalýy múmkin ekenin jazǵan edik.