«Tehnıkalaq aqaý»: Aqtóbeden Astanaǵa usha almaǵan jolaýshylar shaǵymyn jetkizdi
AQTÓBE. KAZINFORM — FlyArystan áýe kompanııasynyń Aqtóbe-Astana baǵytyndaǵy reısi birneshe ret keıinge shegerildi. Kompanııa áýejaıǵa tehnıkalyq aqaý sebep ekenin aıtqan.
FlyArystan áýe kompanııasynyń № 7394 reısi keshe ushýy tıis edi. Alaıda jolaýshylardyń kútip, úıine, qonaqúıge keri oralýyna týra kelgen.
— Biz keshe saǵat 22:30–da áýejaıǵa keldik. Reıs túnde júrýi tıis edi. Tórt saǵat otyryp, aıqaý-shý shyqqan soń ǵana «ushpaıtyn boldyq» dep aıtty. Áýejaıda tań atyryp, saǵat 9:30–da qonaqúıden nómir berdi. Eki saǵat uıyqtaǵandaı bolyp, keri áýejaıǵa baraıyn desek, kólik bolmady. Avtobýsty da aıqaı-shýmen suratyp aldyq. Aqtóbe qalalyq kólik prokýratýrasy aryz qabyldaǵanymen, esh nátıje joq, — dedi jolaýshy Sabına.
Al jolaýshy Amanjol Musaulynyń aıtýynsha, jolaýshylardyń bárine birdeı qonaqúı nómiri jetpedi, keıbiri týma-týysyn jaǵalap ketken.
— Biz 17 aqpan kúni saǵat 00:20–da, ıaǵnı, túnde ushýymyz kerek edi. Áýejaıǵa kelgen soń ony 00:50–ge aýystyrdy. Dál osy kezde Aqtaýǵa, Almatyǵa ózge ushaq ushty, biz qaldyq. Reıske otyrǵan kezde «aýa raıyna baılanysty sál kesh ushamyz» dep shegere berdi. Sóıtip ushaq bortynda 4 saǵat otyrdyq, keıin áýejaıǵa kirgizdi. Ol kezde de aýa raıy dep aıtty. Áýejaı qyzmetkerleri aýa raıynan emes, ushaqtan dep túsindirdi. Muz qatyp, eritetin tehnıka bolmaǵan dep aıtty. Sý da, tamaq ta bermedi. «Qonaqúıde 20 oryn bar, soǵan ǵana adam alamyz» dep aıtqan soń múgedektigi bar adamdar, balalar men jas analarǵa oryn berdik. Qalǵanymyz áýejaıda qaldyq, keıbiri páter jaldady. Aıqaı-shý bolǵan soń taǵy 12 oryn usyndy. Oǵan da baryp, qalǵany áýejaıda qaldy. Saǵat 13:00, 15:00, 17:00–dep ózgerte berdi. Qazir «ushaq zaqym alǵan» dep aıtyp tur. Bıletti qaıtaryp, jańa bılet alýdy usyndy. Onyń baǵasy 140 myń teńge. Al biz bıletti 20 myń teńgege alǵan edik. Buzylǵan ushaqtyń qashan iske qosylatynyn bilmeı otyrmyz», — dedi Amanjol Musauly.
Aqtóbe halyqaralyq áýejaıynyń dırektory Dastan Malıevtiń aıtýynsha, áýejaıdan esh kinárat joq.
— Tehnıkalyq aqaý dep qana aıtty. Ózgesin bizge aıtpady. Aqparatty tek FlyArystan kompanııasy aıtady. Áýejaıda budan ózge reıs keıinge shegerilmedi, — dedi Dastan Malıev.
Kazinform agenttigi FlyArystan áýe kompanııasyna resmı saýal joldady. Kompanııa tehnıkalyq aqaý shyqqanyn rastady.
— 2025 jyldyń 17 aqpanynda oryndalýy tıis Aqtóbe — Astana baǵytyndaǵy FS7394 reısi tehnıkalyq sebepterge baılanysty keshiktirildi. Jolaýshylarǵa sýsyndar, tamaq jáne qonaqúıde ornalastyrý usynyldy. Sondaı-aq, jolaýshylarǵa eń jaqyn reıske tegin qaıta brondaý nemese tólemdi tolyq qaıtarý múmkindigi qoljetimdi. FlyArystan keltirilgen qolaısyzdyqtar úshin shynaıy keshirim suraıdy jáne jolaýshylardyń qaýipsizdigi — áýekompanııamyzdyń basty basymdyǵy ekenin eske salady. Qazirgi ýaqytta máseleni tezirek sheshý úshin barlyq tıisti sharalar oryndalýda. FlyArystan jolaýshylarǵa habarlamalardy What’sApp, SMS nemese bılet brondaý kezinde kórsetilgen elektrondyq poshta arqyly jetkizedi, — dep habarlady FlyArystan áýe kompanııasynyń baspasóz qyzmeti.
Aıta keteıik, Aqtaý mańyndaǵy ushaq apaty boıynsha tergeýdiń esebi jarııalandy.