Tehnıka jóndeımin: Alaıaq elordanyń 18 turǵynyn aldap soqty
ASTANA. KAZINFORM – Elordada ózin túrli tehnıkalardy jóndeıtin shebermin dep tanystyryp kelgen alaıaq 18 turǵynnyń aqshasyn alyp, aldap ketken.
Astana qalalyq prokýratýrasynyń habarlaýynsha, qaskúnem kafe, kompıýterlik klýbtar men dúkenderdi aralap júrip, ózin kondıtsıonerlerdi, beınekameralardy, aýa tartqyshtardy jóndeıtin maman retinde tanystyrǵan.
- Ol ádeıi jáne paıdakúnemdik nıetpen áreket etip, mekeme qyzmetkerleri men ıelerin adastyryp, tehnıkalyq qyzmet kórsetip jatqandaı kórinis qalyptastyrǵan. Jábirlenýshilerdiń senimine kirgen soń, olardyń iri aqshalaryn usaq aqshaǵa aıyrbastap berýdi usynyp, usaq aqsha óziniń avtokóliginde bar ekenin aıtyp, sol jerde qashyp ketken, - delingen habarlamada.
Alaıaqtyń áreketterinen 18 adam zardap shegip, jalpy somasy shamamen 3 mln teńgeniń kóleminde shyǵyn keltirilgen. Ol qarajatty alaıaq jeke qajetine jumsaǵan.
Prokýror usynǵan dálelder negizinde sottalýshynyń kinási tolyqtaı dáleldendi. Sot úkimimen ol 4 jyl 6 aıǵa bas bostandyǵynan aıyrý jazasyna sottaldy. Materıaldyq zalal óndirildi. Úkim zańdy kúshine endi.
Osyǵan deıin Іshki ister mınıstrligi azamattarǵa kontsertter men buqaralyq is-sharalarǵa bıletterdi satyp alý kezinde alaıaqtardyń áreketinen muqııat bolýǵa shaqyrǵany týraly jazdyq.
