Tehnıka rozetkaǵa qosýly tursa, elektr energııasyn tutyna ma: túnde qandaı qurylǵylardy óshirgen durys
ASTANA. KAZINFORM — Qazirgi turmystyq tehnıkanyń bir bóligi óshirilgennen keıin de kútý rejıminde elektr energııasyn tutynýdy jalǵastyrady. Mundaı qurylǵylardyń elektr energııasyna jumsalatyn shyǵynǵa áseri qanshalyqty jáne túnde qandaı tehnıkany rozetkadan ajyratqan durys ekenin Kazinform tilshisi anyqtady.
«Astana-REK» AQ PTS energııa únemdeý jónindegi jetekshi ınjeneri Olga Serdıýkova qazirgi zamanǵy tehnıkanyń kútý rejıminde de elektr energııasyn tutynýy múmkin ekenin aıtty. Bul rejımde qurylǵy ındıkatorlardyń, saǵattyń, qashyqtan basqarý júıeleriniń, jelilik qosylymdardyń jáne basqa da elektrondyq komponentterdiń jumysyn qamtamasyz etedi.
— ıAǵnı pýltpen óshirilgen teledıdardyń elektr qýatynan tolyq ajyratylýy mindetti emes. Eger ındıkatory janyp tursa, dıspleı jumys istese nemese qurylǵyny qashyqtan qosý múmkindigi saqtalsa, ol ádette elektr jelisine qosýly kúıinde qalady jáne energııa tutynýy múmkin, — dep túsindirdi Olga Serdıýkova.
Onyń aıtýynsha, bir qurylǵynyń tutynatyn energııasy ádette az bolady. Sondyqtan rozetkada qaldyrylǵan bir zarıadtaǵysh elektr energııasynyń tólemine aıtarlyqtaı áser ete qoımaıdy. Alaıda teledıdar, oıyn prıstavkasy, kompıýter, aýdıojúıe jáne basqa da tehnıka únemi qosýly tursa, olardyń tutynatyn energııasy qosylady.
Qandaı tehnıka kútý rejıminde elektr energııasyn tutynady
— Eń aldymen, bul elektrondyq basqarý júıesi bar zamanaýı tehnıka. Olarǵa teledıdarlar men medıaprıstavkalar, kompıýterler men monıtorlar, oıyn konsolderi, aýdıojúıeler, prınterler, keıbir mıkrotolqyndy peshter men kofeqaınatqyshtar jatady. Sondaı-aq ártúrli qýat kózderi men zarıadtaǵyshtar da osy sanatqa kiredi, — dedi sarapshy.
Roýterler men basqa da jelilik qurylǵylardyń ereksheligi bar. Olar úzdiksiz jumys isteýge arnalǵandyqtan, ádette táýlik boıy qosýly turady jáne elektr energııasyn turaqty túrde tutynady.
Qurylǵynyń kútý rejıminde turǵanyn onyń óshirilgennen keıin de ındıkatorynyń nemese dıspleıiniń jumys isteýinen baıqaýǵa bolady. Sondaı-aq tehnıkany qashyqtan basqarý pýlti nemese basqa qural arqyly qaıta qosý múmkindigi de onyń elektr jelisine qosýly ekenin kórsetedi.
Túnde qandaı tehnıkany óshirýge bolady
Mamannyń aıtýynsha, túnde nemese úıde uzaq ýaqyt eshkim bolmaıtyn kezde paıdalanylmaıtyn tehnıkany rozetkadan ajyratýǵa bolady.
— Olarǵa teledıdarlar, oıyn prıstavkalary, kompıýterler, prınterler, aýdıojúıeler jáne zarıadtaǵyshtar jatady. Bul ásirese birneshe kúnge nemese demalysqa ketetin kezde mańyzdy, — dep túsindirdi ol.
Birneshe qurylǵyny qosqyshy bar bir elektr súzgisine qosyp qoıýǵa bolady. Mysaly, teledıdardy, prıstavkany jáne aýdıojúıeni bir ýaqytta elektr jelisinen ajyratý yńǵaıly.
Degenmen Olga Serdıýkova bir shaǵyn qurylǵyny óshirý arqyly aıtarlyqtaı únemge qol jetkizý qıyn ekenin atap ótti.
— Bir qurylǵyny rozetkadan ajyratý ádette az ǵana únem beredi. Al únemi elektr jelisine qosýly turatyn birneshe qurylǵynyń jıyntyq tutynýyn azaıtý arqyly nátıje aıqynyraq bolýy múmkin, — dedi sarapshy.
Qandaı tehnıkany óshirýge bolmaıdy
Alaıda barlyq turmystyq tehnıkany elektr jelisinen ajyratýǵa bolmaıdy. Úzdiksiz jumys isteýi qajet qurylǵylardy óshirý usynylmaıdy.
— Eń aldymen, bul tońazytqyshtar men muzdatqyshtar. Olardy uzaq ýaqytqa óshirý azyq-túliktiń buzylýyna ákelýi múmkin. Sondaı-aq roýterlerdi, kúzet júıelerin jáne úzdiksiz jumys isteýge nemese qaýipsizdikti qamtamasyz etýge arnalǵan basqa da qurylǵylardy qajetsiz jaǵdaıda óshirmegen jón, — dedi sarapshy.
Osylaısha, rozetkada qaldyrylǵan bir zarıadtaǵysh elektr energııasyna tólenetin somanyń aıtarlyqtaı ósýine sebep bola qoımaıdy. Alaıda únemi qosýly turǵan kóptegen qurylǵynyń jıyntyq energııa tutynýyn azaıtý elektr energııasynyń shyǵynyn qysqartýǵa múmkindik beredi.
Buǵan deıin Shymkentte elektr jelilerindegi aqaý 43 myńnan astam abonentti jaryqsyz qaldyrǵanyn jazdyq.
