Tehastan Kanzas-Sıtıge deıin: AQSh-ta álemdegi eń uzyn naızaǵaı rekordyna túzetý engizildi
ASTANA. Kazinform — Birikken Ulttar Uıymynyń Dúnıejúzilik meteorologııalyq uıymynyń (DMU) málimdemesine sáıkes, 2017 jyldyń qazan aıynda AQSh-tyń Tehas pen Kanzas shtattary arasynda baıqalǵan uzyndyǵy 829 shaqyrymdy quraıtyn naızaǵaı eń uzyn naızaǵaı boıynsha jańa álemdik rekord retinde tirkeldi, dep habarlady DMU 31 shilde kúni.
— Dúnıejúzilik meteorologııalyq uıym eń uzyn naızaǵaı boıynsha jańa álemdik rekordty tirkedi. Qurama Shtattardaǵy tanymal daýyl aımaǵynda 829 shaqyrymǵa jetken (515 mıl) tańǵajaıyp naızaǵaı oınaýy baıqaldy. Bul úlken naızaǵaı 2017 jyldyń qazan aıynda Tehastyń shyǵysynan Kanzas-Sıtıge deıingi aýmaqty qamtydy. Qashyqtyq Eýropadaǵy Parıj ben Venetsııa arasyndaǵy qashyqtyqpen birdeı. Osyndaı qashyqtyqty júrip ótý úshin kólikte shamamen segiz-toǵyz saǵat, al kommertsııalyq ushaqta keminde 90 mınýt ketedi, - delingen qujatta.
Jahandyq tótenshe oqıǵalar týraly resmı derekterdi saqtaıtyn DMU-nyń Aýa-raıy jáne klımattyq tótenshe jaǵdaılar jónindegi komıteti de sońǵy jasandy jer serigi tehnologııasyn paıdalana otyryp, bul jańa rekordty rastady.
829 shaqyrym (515 mıl) jańa rekordynda ± 8 shaqyrym (5 mıl) qatelik shegi bar. Bul 2020 jyldyń 29 sáýirinde Amerıka Qurama Shtattarynyń ońtústiginde 768 ± 8 shaqyrym (477,2 ± 5 mıl) qashyqtyqta ornatylǵan rekordtan 61 shaqyrymǵa artyq. Demek, bul rekordqa odan 3 jyl buryn oryn alǵan oqıǵa arqyly túzetý engizilip otyr.
— Bul jańa rekord tabıǵı apattardyń keremet kúshin aıqyn kórsetedi. Sonymen qatar, DMU-nyń osy rekordtyq deńgeıdegi tótenshe ekologııalyq oqıǵalardy baǵalaýy mundaı oqıǵalardy baqylaý, qujattaý jáne baǵalaýdaǵy eleýli ǵylymı jetistikterdi kórsetedi. Bul jerde neǵurlym aýyr ekstremaldy oqıǵalar bolýy múmkin jáne ýaqyt óte kele naızaǵaıdyń joǵary sapaly ólshemderi jınaqtalǵandyqtan, biz olardy baqylaı alamyz, — dedi DMU aýa-raıy jáne ekstremaldy klımattyq oqıǵalar jónindegi baıandamashysy Rendall Chervenıa.
Eske sala keteıik, Úndistannyń shyǵysynda naızaǵaı soǵýynan 33 adam qaza tapty.