Tehastaǵy sý tasqynynan mert bolǵandar sany 51-ge jetti, olardyń 15-i balalar

ASTANA. KAZINFORM – Tehastaǵy sý tasqynynan soń qutqarýshylar iz-túzsiz joǵalǵandardy tabý úshin ózen jaǵalaýlary men úıindilerdi arshydy, dep habarlaıdy Euronews.

Euronews-tiń habarlaýynsha, Tehasta nóser jaýyn saldarynan bolǵan sý tasqynynan keminde 51 adam mert boldy, onyń 15-i bala. Sý basqannan keıin bir jarym táýlik ótti, alaıda bılik ókilderi hrıstıandardyń Christian Camp Mystic jazǵy lagerindegi 27 baladan basqa qansha adamnyń iz-túzsiz joǵalǵanyn naqtylamady. Mert bolǵandardyń kópshiligi jaqyn mańnan tabylǵan.

Juma kúni Gvadelýpe ózeni nebári 45 mınýttyń ishinde segiz metrden asa kóterilip, úıler men lagerlerdi jáne avtokólikterdi qıratty. Tehas shtatynda demalys kúnderi tolassyz jaýǵan nóser jańbyr tasqynǵa ulasty, sý tasqyny týraly jańa eskertýler jarııalandy.

Senbi kúni izdeý-qutqarý jumystary kúsheıtildi, sý ortasynda qalǵan turǵyndardy qutqarý jáne iz-túzsiz ketkenderdi tabý úshin tikushaqtar, qaıyqtar jáne drondar jumyldyryldy.

-Biz olardyń bárin tabamyz,-dedi gýbernator Greg Ebbot.

Kerr okrýgynyń sherıfi Larrı Leıta Hıll Kantrı óńirinde 32 adamnyń qaza tapqanyn rastady. Olardyń 18-i eresek adam, al 14-i bala. Sondaı-aq Trevıs jáne Bernet okrýgterinde de adamdardyń qaza bolǵany habarlandy.

Qutqarý jumystary demalys kúnderine deıin jalǵasady. Bılik ókilderi iz-túzsiz ketkenderdi izdeýmen jáne shyǵynnyń jalpy aýqymyn baǵalaýmen aınalysyp jatyr.

Qazaqstan Prezıdenti Qasym-Jomart Toqaev Donald Trampqa Tehas shtatyndaǵy alapat sý tasqyny saldarynan kóptegen adamnyń, sonyń ishinde balalardyń qaza tapqanyna baılanysty kóńil aıtý jedelhatyn joldady.