Tehastaǵy sý tasqyny: Qaza tapqandar sany 100-den asty, 28 bala bar

ASTANA. KAZINFORM — AQSh-tyń Tehas shtatyndaǵy kúshti sý tasqyny saldarynan, sońǵy málimetter boıynsha, 104 adam qaza tapty, onyń ishinde 28 bala bar. Apattan keıin tórt kún ótse de, 24 adam áli de habar-osharsyz ketkender qatarynda, dep jazdy BBC.

Jergilikti bıliktiń málimetinshe, eń kóp zardap shekken Kerr okrýginde dúısenbi keshine qaraı 84 adamnyń qaza tapqany rastaldy, taǵy 11 adam iz-túzsiz joǵalǵandar qatarynda.

Trevıs, Bernet, Ýılıamson, Kendall jáne Tom Grın atty bes ózge okrýgte 20 adamnyń qaza tapqany rastaldy, taǵy 13 adam habarsyz ketken.

AQSh-tyń Ulttyq meteorologııalyq qyzmetiniń derekterine sáıkes, 4 shildege qaraǵan túni Kerr okrýginiń bir bóliginde úsh-ten alty saǵat aralyǵynda 125-ten 250 mm-ge deıin jaýyn-shashyn túsken. Bul óńirde shilde aıynda ádette 50 mm shamasynda ǵana jaýyn túsedi. Demek, keıbir aımaqtarǵa birneshe saǵat ishinde aılyq normadan tórt-bes ese kóp jaýyn jaýǵan.

Donald Tramp Tehas shtatynda tótenshe jaǵdaı rejımin engizdi.

Eske salsaq, Tehasta nóser jańbyrdan keıin sý tasqyny bolyp, qutqarýshylar áli kúnge deıin ózen jaǵalaýlaryn tekserip, joǵalǵandardy izdeý úshin úıindilerdi qopardy. 

Qazaqstan Prezıdenti Qasym-Jomart Toqaev Donald Trampqa Tehas shtatyndaǵy alapat sý tasqyny saldarynan kóptegen adamnyń, sonyń ishinde balalardyń qaza tapqanyna baılanysty kóńil aıtý jedelhatyn joldady.