Tehasta sý tasqyny saldarynan qaza tapqandar sany 43 adamǵa jetti
ASTANA. KAZINFORM – AQSh-tyń Tehas shtaty, Kerr okrýgindegi joıqyn sý tasqyny saldarynan 43 adam, sonyń ishinde 15 bala qaza tapty. Bul týraly okrýg bıligi málimdedi, dep habarlaıdy BBC.

Qaza tapqan eresekterdiń beseýi jáne úsh bala ázirge sáıkestendirilgen joq. Shtat bıligi qurbandar sanynyń artýy múmkin ekenin joqqa shyǵarmaıdy. Qazirgi ýaqytta jazǵy lagerde demalyp jatqan 27 qyz bala iz-tússiz joǵalǵandar qatarynda.
— Qutqarylǵandar men evakýatsııalanǵandar sany 850 adamdy qurady, olardyń segizi túrli jaraqat alǵan, — dedi Kerr okrýginiń sherıfi Larrı Lıta senbi kúni keshkisin ótken baspasóz máslıhatynda.
Tehastyń birneshe okrýginde tótenshe jaǵdaı jarııalandy: kóptegen joldar qıraǵan, telefon baılanysy istemeıdi.
Qutqarýshylar San-Antonıodan 104 shaqyrym soltústik-batysta ornalasqan Kervıll qalasyna jaqyn mańdaǵy Camp Mystic jazǵy lagerinde demalyp jatqan 27 qyz balany izdestirýdi jalǵastyryp jatyr. Larrı Lıtanyń aıtýynsha, bul operatsııa barlyq balalar tabylǵansha toqtatylmaıdy.
AQSh-tyń Ulttyq meteorologııalyq qyzmeti (NWS) Tehastyń ońtústik-ortalyǵynda ornalasqan Komal okrýginde de sý tasqyny qaýpi bar ekenin habarlady.
Buǵan deıin Tehasta sý tasqyny kezinde 24 adamnyń qaza tapqany týraly habarlanǵan bolatyn.
Aıta ketelik Pákistanda tótenshe aýa raıy saldarynan qaza tapqandar sany artqany týraly jazǵan edik.