Tehasta polıtsııa qyzmetkeri stýdentti joldaǵy jyldamdyqty asyrǵany úshin atyp tastady
ASTANA. 8 jeltoqsan. QazAqparat - AQSh-tyń San-Antonıo qalasynda (Tehas shtaty) polıtsııa qyzmetkeri qarýsyz stýdentti atyp tastady, dep habarlaıdy ITAR-TASS agenttigi.
Jergilikti BAQ-tyń jazýynsha, quqyq qorǵaý organynyń qyzmetkeri 23 jasar stýdent Kemeron Redýsty jyldamdyqty asyrǵany úshin toqtatqan. Keıin olardyń aralarynda janjal týyp, polıtseı kóp oılanbastan jas jigitke oq jaýdyrǵan.
Redýs alǵan jaraqattardan sol jerde jan tapsyrdy. Stýdent qarýsyz bolǵan. Qazirgi ýaqytta oqıǵa tergeýge alyndy. Oq atqan polıtseı laýazymynan ýaqytsha shettetildi.
Ókinishke oraı, bundaı jaǵdaılar bul elde sońǵy ýaqytta jıi kezdesetin boldy. 2011 jyly 23 sáýir kúni amerıkalyq Portsmýt qalasynda Qazaqstannan barǵan ımmıgrant Kırıll Denıakın polıtseıdiń qateliginen kóz jumǵan bolatyn. Polıtsııa qyzmetkeri ony tonaýshy dep oılap qalyp, atyp óltirgen.
Qyrkúıek aıynda Soltústik Karolına shtatynyń Sharlott qalasynda 24 jastaǵy qarýsyz jigit polıtseılerdiń oǵynan kóz jumdy. Keıin anyqtalǵanyndaı, ol jigit apatqa ushyrap, shuǵyl kómekke zárý bolǵan.
Hıýstonda polıtsııa ofıtseri qalammen "qarýlanǵan" arbadaǵy múgedekti atyp tastaǵany týraly da buryn habarlaǵan bolatynbyz. Oqıǵa jazylmaıtyn naýqastar úıiniń bir turǵyny shý shyǵarǵan soń, atalmysh meken-jaıǵa polıtsııa kelgen soń boldy. Naýqastyń shý shyǵarýyna qyzmetkerdiń temeki bermeı qoıýy sebep bolǵan.
