Tehasta atys saldarynan 5 adam kóz jumyp, 21-i jaraqattandy
VAShINGTON. QazAqparat - AQSh-tyń Tehas shtatynda ornalasqan Mıdlend jáne Odessa qalalarynda atys bolyp, 5 adam kóz jumdy, taǵy 21-i jaraqattandy, dep habarlaıdy «QazAqparat» HAA tilshisi USA Today-ge silteme jasap.
Tehas shtatynyń qoǵamdyq qaýipsizdik departamentinen málim etkendeı, atys jergilikti ýaqyt boıynsha saǵat 15:17-de bastalǵan. Patrýldik-bekettik qyzmettiń eki qyzmetkeri jol erejesin buzǵany úshin avtokólik júrgizýshisin toqtatqan.
Toqtamas buryn er adam vıntovka alyp shyǵyp, artqy tereze arqyly ofıtserlerge oq atqan. Saldarynan bireýi jaraqat aldy. Odan keıin avtokóligimen ornynan qozǵalyp, basqa júrgizýshiler men ótip bara jatqan adamdarǵa oq jaýdyrǵan. Keıin ol AQSh poshta qyzmetiniń avtokóligin minip ketken.
Qoǵamdyq qaýipsizdik departamentiniń málimetinshe, patrýldik-bekettik qyzmettiń taǵy eki ofıtseri jaralanǵan. Qylmyskerdiń ózi bir-birinen birneshe shaqyrymda ornalasqan Mıdlend jáne Odessa qalalarynan kómekke attanǵan ofıtserlerdiń qolynan mert boldy.
Jaralanǵandardyń arasynda 1,5 jasar qyz bala bar. Ol aýrýhanaǵa jetkizildi. Keıin dárigerler onyń jaǵdaıyn «qanaǵattanarlyq» dep baǵalady.
AQSh Prezıdenti Donald Tramp bas prokýror Ýılıam Barr Tehasta bolǵan atys týraly aqparat bergenin málim etti. Tramp Federaldyq tergeý bıýrosy men quqyqqorǵaý organdary tolyqtaı júmyldyrylǵanyn atap ketti.
Buǵan deıin osyǵan uqsas oqıǵalar Tehas shtatynyń El-Paso qalasynda, Ogaıo shtatynyń Deıton qalasynda, Kalıfornııa shtatynyń Gılroı qalasynda bolǵan edi.
2019 jyly qarýly atystyń saldarynan jalpy 602 adam kóz jumyp, 2356 adam jaraqat aldy.
