Tehas shtatynyń bıligi «Harvı» daýyly keltirgen shyǵyndy 180 mlrd dollarǵa baǵalady
ASTANA. QazAqparat - Tehas shtatynyń gýbernatory Greg Ebbot «Harvı» daýylynyń saldarymen kúreske 150-180 mlrd dollar qajet bolýy múmkindigin aıtty. Bul týraly Reuters agenttigi habarlady.
Ebbottyń sózinshe, osy jolǵy daýyl qıratqan aýmaq «Katrına» men «Sendıden» de aýqymdy bolyp otyr. Osy kezde qalpyna keltirý jumystaryna qajetti qarjy qalaı tólenetini talqylanýda.
AQSh prezıdentiniń ákimshiligi kongresten 7,8 mlrd dollar kólemindegi alǵashqy somany bólýdi surady. Ebbot buny avanstyq tólem dep otyr. Tótenshe jaǵdaılar jónindegi federaldyq agenttik ókilderi osy baǵyttaǵy jumystardy qarjylandyrýǵa jergilikti sheneýnikter de úles qosýlary kerek degen pikirde.
