Tehas shtatynda týrnırge bara jatqan sport komandasy ushaq apatynan qaza tapty
ASTANA. KAZINFORM – Ótken túni Tehas shtatynda shaǵyn ushaq áýede otqa oranyp, apatqa ushyrady. Cessna 421C bortynda pıklbol komandasynyń bes oıynshysy bolǵan. Barlyq jolaýshy men ushqysh oqıǵa ornynda qaza tapty, dep habarlaıdy BILD.
Ushaq Amarıllo qalasynan ushyp shyǵyp, Nıý-Braýnfels baǵytyna bet alǵan. Aldyn ala málimet boıynsha, apat aldynda áýede tehnıkalyq aqaý týyndaǵan bolýy múmkin.
Týrnırge bet alǵan ekinshi ushaqtyń pıloty apatqa ushyraǵan ushaqpen qatar ushyp kele jatqan.
Áýe dıspetcheri de apat aldynda ushaqtyń erekshe manevr jasaǵanyn habarlady.
— Ol ádetten tys qozǵala bastady da, keıin radardan joǵalyp ketti, — dedi ol.
Qaıǵyly oqıǵa klýb pen búkil qala turǵyndaryn eseńgiretip tastady. Amarillo Pickleball Club málimetinshe, qaza tapqandar týrnırge bara jatqan.
Pıklbol — tennıs, badmınton jáne ústel tennısiniń elementterin biriktiretin raketkaly sport túri. Ol ádette shaǵyn alańda oınalady.
Ushaqtyń ne sebepti qulaǵany ázirge belgisiz. Bılik ókilderiniń aıtýynsha, áýede basqa ushaqpen soqtyǵys belgileri anyqtalmaǵan.
Federaldyq avıatsııa ákimshiligi (FAA) men Ulttyq kólik qaýipsizdigi keńesi (NTSB) tergeý júrgizip jatyr.
