Tegý meri Almaty men Qazaqstanǵa aldaǵy 7-shi Qysqy Azııa oıyndaryn tabysty ótkizýge tilek etti
ALMATY. Tamyzdyń 9-y. QazAqparat /Danııar Sıqymbaev/ - Almaty qalasynyń Tegý qalasyndaǵy (Koreıa Respýblıkasy) mádenıet kúnderi sheńberinde qala ákimi Ahmetjan Esimov Kemen Ulttyq ýnıversıtetinde boldy.
Birneshe jyl qatarynan Qazaqstan men Koreıa Respýblıkasy arasynda densaýlyq saqtaý salasyndaǵy qalalar baılanysy baǵdarlamasy júzege asyrylýda. Almatydaǵy Koreı mádenıet ortalyǵynda «Dosson» klınıkasy jumys jasaýda. Jyl saıyn bul jerde Kemen Ulttyq ýnıversıtetiniń dárigerleri emdeý sharalaryn ótkizedi. Joǵary oqý ornynyń prezıdenti Shın Il Haımen kezdesý kezinde Almaty ákimi A.Esimov Almaty qalasy men «Dossan» medıtsınalyq ortalyǵy Kemen Ulttyq ýnıversıteti arasyndaǵy túsinistik týraly Memorandýmǵa qol qoıdy.
Mádenı kúnder barysynda ótkizilgen gala kontsertte óner juldyzdary: Nurjamal Úsenbaeva, Asylbek Eńsepov, Aıgúl Qosanova, «Arnaý» dýeti, «Sazgen sazy» folklorlyq-etnografııalyq ansambli jáne basqalary óner kórsetti. Munda otandyq dızaınerler óz kıim úlgilerin talǵampaz koreılikterge usyndy. Qoldanbaly óner, kóne zerger buıymdarynyń da kórmesi kópshilikti qyzyqtyrdy.
Tegý meri Kım Bým-Il Almaty men Qazaqstanǵa aldaǵy jetinshi qysqy Azııa oıyndaryn tabysty ótkizýge tilektestigin bildirdi.
Almaty men Tegý qalalary arasyndaǵy baýyrlastyq baılanys jónindegi kelisimge 1991 jyly qol qoıylǵan bolatyn.
Tegý - Koreıa Respýblıkasynyń halyq jıi ornalasqan iri eldi mekenderiniń biri. Atalǵan qala eksportqa taýar shyǵaratyn ortalyqtardyń biri bolyp sanalady. Tegýde metall óńdeý men mashına jasaý salasy jaqsy damyǵan. Munda eksportqa mata buıymdary da kóptep shyǵarylady.
Ýnıversıtette sóılegen sózinde Almaty qalasynyń ákimi ǵylymı jańashyl jobalardyń arqasynda Ońtústik Koreıaniń qol jetkizgen tabystaryn atap ótti. «Almatydaǵy «Dosson» klınıkasy - bul jemisti qarym-qatynastardyń jaqsy bastamasy. Qazaqstan óz qanatynyń astyna júzden astam ult ókilderin toptastyrǵan biregeı memleket jáne munyń barlyǵy bizdiń Prezıdentimizdiń syndarly saıasatynyń arqasynda júzege asyp otyr. Biz beıbitshilik pen kelisimde ómir súremiz jáne dostas memleketke aramyzdaǵy qarym-qatynastarymyzdyń odan ári damýy úshin qoldan kelgendi aıamaımyz, - dep atap ótti A.Esimov.
