Tegran AQSh-tyń BUU Qaýipsizdik Keńesiniń qaraýyna engizgen Iran boıynsha qarardyń jobasyn «zańsyz» dep sanaıdy
ASTANA. Mamyrdyń 20-sy. QazAqparat - Qurama Shtattardyń BUU Qaýipsizdik Keńesiniń qaraýyna engizgen Iranǵa qatysty qarardyń jobasy «zańdy dep tanylmaýy kerek». Bul týraly sársenbi kúni «Fars» aqparat agenttigine bergen suhbatynda Islam Respýblıkasy prezıdentiniń keńesshisi Mojtaba Samare Hashemı málim etti,
dep habarlaıdy ITAR-TASS agenttigi.
Dúısenbi kúni Tegranda Iran, Túrkııa jáne Brazılııa elderiniń syrtqy ister mınıstrleri qol qoıǵan ıadrolyq otyn almasý týraly kelisimge qatysty AQSh-tyń bul reaktsııasyn Mojtaba Samare Hashemı «barabar emes» dep atady. «Degenmen, sál kúteıik, múmkin amerıkandyqtar óz kózqarastaryn áli ózgerter»,- dedi Hashemı myrza óz sózinde.
Dúısenbi kúni Tegranda úshjaqty ıran-túrik-brazılııa kelisimine qol qoıylǵanyn QazAqparat buǵan deıin habarlaǵan bolatyn. Ol qujatqa sáıkes Iran Túrkııaǵa 1200 keli tómen baıytylǵan óz ýranyn shyǵaryp, ony Tegran zertteý reaktorynyń jumysyna qajetti 20 paıyzdyq ıadrolyq otynǵa almastyrýǵa kelisti.
Buǵan deıin resmı Tegran, mundaı almasý protsesi usaq partııamen (shamamen 400 kelideı), ózara qatar jáne tek ıran aýmaǵynda jasalǵanyn talap etken bolatyn.
