Tegin jáne jeńildikpen beriletin dáriler tizimi jańartyldy
ASTANA. KAZINFORM — Densaýlyq saqtaý mınıstrligi tegin jáne jeńildikpen beriletin dáriler men medıtsınalyq buıymdar tizbesin jańartty.
Tıisti ózgerister Densaýlyq saqtaý mınıstriniń 2026 jylǵy 25 mamyrdaǵy buıryǵymen engizildi.
Qujatta tegin medıtsınalyq kómektiń kepildik berilgen kólemi men mindetti áleýmettik medıtsınalyq saqtandyrý júıesi aıasynda patsıentterge beriletin dárilik zattar, medıtsınalyq buıymdar jáne arnaıy emdik taǵamdardyń tizbesi aıqyndalǵan.
Jańartylǵan tizimge eresekter men 18 jasqa deıingi balalarǵa arnalǵan dári-dármekter, medıtsınalyq buıymdar jáne arnaıy emdik taǵamdar engizilgen.
Tegin medıtsınalyq kómektiń kepildik aıasynda qan aınalymy, tynys alý, as qorytý, júıke, endokrındik, súıek-bulshyqet júıesi men dáneker tin aýrýlary, sondaı-aq teri aýrýlary bar patsıentterdi dári-dármekpen qamtamasyz etý kózdelgen.
Sonymen qatar tizimge qan jáne qan túzý aǵzalary aýrýlaryn, psıhıkalyq jáne minez-qulyq buzylystaryn, ınfektsııalyq jáne parazıttik aýrýlardy, onkologııalyq dertterdi emdeýge arnalǵan preparattar engizilgen. Sondaı-aq pallıatıvtik kómek alatyn naýqastar men aǵza ne tin transplantatsııasynan keıingi patsıentterge arnalǵan dáriler de qamtylǵan.
Budan bólek, qujatta MÁMS aıasynda eresekter men balalarǵa beriletin dárilik zattar men medıtsınalyq buıymdardyń jeke tizbesi kórsetilgen.
Buıryq 2027 jylǵy 1 qańtardan bastap kúshine enedi.
Aıta keteıik, buǵan deıin Densaýlyq saqtaý mınıstrligi dári-dármek pen medıtsınalyq buıymdardyń kóterme jáne bólshek saýdasyn júrgizý erejelerine túzetýler ázirlegenin habarlaǵan edik.
