Tegin úıirmeler bir vaýcherge biriktirilýi múmkin

ASTANA. KAZINFORM – Bıýdjet esebinen qarjylandyrylatyn bilim berý, sport jáne shyǵarmashylyq baǵyttaǵy balalar úıirmeleri biryńǵaı vaýcherge biriktirilýi múmkin. Sol úshin  Úkimet áýeli eki qala men úsh oblysta qanatqaqty jobany iske asyrmaqshy.

Bul týraly Premer-mınıstr Oljas Bektenovtiń Senat depýtatynyń saýalyna joldaǵan jaýabynda aıtylǵan.

- Bıyl qyzmetterdi avtomattandyrý jumystary aıasynda bilim berý, sport jáne shyǵarmashylyq baǵyttary boıynsha memlekettik úsh tapsyrys biriktirilip, biregeı vaýcher arqyly pılottyq joba iske qosylady. Jobany bıylǵy 1 shildeden bastap eki óńirde (Astana, Shymkent q.), 1 qyrkúıekten bastap úsh óńirde (Aqtóbe, Qyzylorda, Atyraý oblystary) iske qosý josparlanyp otyr, - dep jazylǵan jaýapta.

Joba aıasynda úıirmege qatysatyn balalardyń esebin QR-kodtar men bıometrııalyq sáıkestendirý (ata-analardyń kelisimimen) arqyly júrgizý kózdelip otyr.

- Jobany «Áleýmettik ámııan» aqparattyq júıesimen ıntegratsııalaý kózdelgen. Bul bıýdjet qarajatyn bólýdiń ashyqtyǵy men tıimdiligin, sport sektsııalary men shyǵarmashylyq úıirmelerdiń shyǵystaryn avtomatty túrde baqylaýdy qamtamasyz etip, memleket qarajatynyń maqsatsyz jumsalýyn boldyrmaýǵa múmkindik beredi, - deıdi Oljas Bektenov.

Úkimet basshysynyń jaýabynda memlekettik sporttyq tapsyrysty qarjylandyrýdy aýdandyq jáne qalalyq deńgeıge berilse, baqylaý deńgeıi tómendeıtini aıtylǵan. Sondyqtan qarjylandyrý fýnktsııasy oblystyq basqarmalardyń quzyretinde qala bermek.

Eske salsaq, sáýir aıynyń aıaǵynda Almatyda «Damubala» baǵdarlamasyna qyzmet kórsetýshilerge qaıta irikteý bastalǵan bolatyn.