Tegin syılyqtar mıllıondyq nesıege aınalǵan: Qostanaıda tutynýshylar shaǵymy kóbeıdi

ASTANA. KAZINFORM – Qostanaı oblysynyń Saýda jáne tutynýshylar quqyǵyn qorǵaý departamentine massajdy japqyshtardy satyp alýǵa qatysty aqshany qaıtarý úshin sotqa deıingi talap-aryz jazýǵa kómek surap kelip túsken ótinishter kóbeıdi.

Azamattardyń aıtýynsha, kóshede belgisiz adamdar konverttegi «utylmaıtyn lotereıany» usyný arqyly túrli turmystyq tehnıkany (shańsorǵysh, útik, mıkrotolqyndy pesh jáne t.b.) «syılyqqa» beredi. Artynsha olardy qalanyń meıramhanalary men kafelerine shaqyryp, «tegin syılyqtardy» saltanatty túrde tabystaıdy. Osy jerde massajdy japqyshtar tanystyrylyp, eger qolma-qol aqsha bolmasa, birden Kaspi nemese Halyq bank qosymshalary arqyly nesıe rásimdetiledi.

Uıymdastyrýshylar nesıe merzimin ár adamnyń nesıe tarıhyna qaraı ártúrli etip belgileıdi. Sonyń saldarynan «tegin syılyqtar» naýqanyna qatysqan tutynýshylar mıllıon teńgeden astam nesıe rásimdep, taýardy bazardaǵy baǵadan birneshe ese qymbatqa satyp alǵanyn tek úıge kelgen soń ańǵarady.

Mamandardyń aıtýynsha, eger mundaı jaǵdaıǵa tap bolsańyz jáne taýarǵa nesıe rásimdegen bolsańyz, «Tutynýshylardyń quqyqtaryn qorǵaý týraly» zańnyń 14-babyna sáıkes, 14 kún ishinde taýardy qaıtaryp, aqshany talap etýge quqyǵyńyz bar. Ol úshin satýshyǵa sotqa deıingi talap-aryz jazyp nemese departamentke Qostanaı qalasy, Ál-Farabı dańǵyly 115/1 mekenjaıy boıynsha nemese e-otinish.kz arqyly júginýge bolady.

- Satýshy tutynýshynyń talap-aryzyna 10 kún ishinde jaýap berýge mindetti. Bul rette satyp alynǵan taýar men syılyqtardy qaıtarý qajet. Sonymen qatar bankke satýshynyń agressıvti marketıng ádisterin, baǵasynyń birneshe ese qymbattyǵyn, psıhologııalyq yqpal etý áreketterin kórsetip shaǵymdanýǵa bolady. Bul satýshyny adal emes kásipkerler tizimine engizip, bank esepshottaryn buǵattaýǵa múmkindik beredi, - dep túsindirdi departamentten.

Keı jaǵdaılarda kelisimsharttaǵy satýshynyń zańdy mekenjaıy bolmaýy múmkin. Mundaıda tutynýshy sotqa júginip, kelisimshartty buzýdy jáne aqshany qaıtarýdy talap ete alady.

Departament kúmándi sharalarǵa qatyspaýǵa keńes berip otyr. «Tegin syılyq bolmaıdy, tek qana qaqpandaǵy irimshik tegin» degen naqyldy eske salyp, saq bolýdy eskertedi.

Aıta keteıik, Qarjylyq monıtorıng agenttigi alaıaqtyqtyń jańa túri týraly eskertti.