Tegin operatsııadan robotqa deıin: Qazaqstan travmatologııasynda úlken ózgerister bolyp jatyr
ASTANA. KAZINFORM — Býyn aýystyrý, omyrtqaǵa operatsııa, kúrdeli rekonstrýktsııalyq otalar — Qazaqstanda mundaı medıtsınalyq kómektiń edáýir bóligi patsıentterge tegin kórsetiledi. Jyl saıyn 130 myńnan astam operatsııa jasalady, al sońǵy bes jylda endoprotezdeý kólemi shamamen 50%-ǵa artqan. Endi salaǵa robot, navıgatsııa jáne 3D tehnologııalar da belsendi enip jatyr. Bul týraly Densaýlyq saqtaý mınıstrligi málim etti.
Qazaqstanda jyl saıyn shamamen 3 mln adam emhanalarda, statsıonarlarda jáne travmatologııalyq pýnktterde konsýltatsııalyq kómek alady. TMKKK jáne MÁMS sheńberinde jyl saıyn 130 myńnan astam operatsııa jasalady, onyń ishinde shuǵyl jáne josparly hırýrgııalyq aralasýlar bar.
Sońǵy bes jyldyń ishinde endoprotezdeýdiń kólemi 50%-ǵa jýyq ósti. Bul memleket kepildikteriniń esebinen halyq úshin joǵary tehnologııalyq ortopedııalyq kómektiń qoljetimdiligi artqanyn kórsetedi.
Joǵary tehnologııalyq medıtsınalyq kómektiń de turaqty kólemi saqtalýda. 2025 jyly 1,5 myńnan astam JTMQ kórsetildi, onyń ishinde:
- omyrtqaǵa 300-den astam operatsııa;
- 1 000-nan astam revızııalyq endoprotezdeý operatsııasy;
- iri býyndarǵa 4,5 myńnan astam artroskopııalyq operatsııa jasaldy.
Bul hırýrgııalyq aralasýlardyń barlyǵy mamandardyń joǵary biliktiligin, zamanaýı jabdyqtardy jáne klınıkalyq standarttardy qatań saqtaýdy talap etedi ári patsıentter úshin tegin júrgiziledi.
Negizgi júkteme dástúrli túrde elimizdiń jetekshi beıindi ortalyqtaryna, onyń ishinde Ulttyq travmatologııa jáne ortopedııa ǵylymı ortalyǵyna túsedi.
Sonymen qatar medıtsına tehnologııalyq turǵydan da damyp keledi. Klınıkalyq praktıkaǵa kezeń-kezeńimen:
- omyrtqa hırýrgııasyndaǵy navıgatsııalyq júıeler;
- endoprotezdeýdegi robottandyrylǵan tehnologııalar;
- býyndardyń degeneratıvti aýrýlaryn emdeýdegi jasýshalyq ádister;
- kúrdeli rekonstrýktsııalyq operatsııalarǵa arnalǵan 3D-jeke ımplanttar engizilmek.
Sonymen birge óńirlerdegi travmatologııalyq qyzmet te kúsheıtilip jatyr.
2027 jylǵa deıin Qazaqstanda óńirlik travmatologııalyq ortalyqtar jelisi qurylady, shokqa qarsy bólimsheler jańǵyrtylady, shuǵyl medıtsınalyq kómekti jáne jaraqattanýdyń prlfılaktıkalyq sharalaryn kúsheıtý josparlanǵan.
Búginde mamandandyrylǵan kómekti 1 500-den astam travmatolog dáriger kórsetedi. Elde 81 travmatologııalyq pýnkt, 4 myńnan astam beıindi tósek jáne 260 medıtsınalyq uıym jumys isteıdi. Kadrlyq áleýetti nyǵaıtý jáne qyzmet ınfraqurylymyn damytý jumystary jalǵaspaq.
Buǵan deıin almatylyq dárigerler balanyń julynyp ketken saýsaǵyn qalpyna keltirgenin jazǵan edik.
