Tegin medıtsınalyq kómek kólemi artady - Mádı Takıev

ASTANA. KAZINFORM – 2025 jyly densaýlyq saqtaý salasyna 2,4 trln teńge qarastyrylǵan. Bul týraly búgin Májilistiń jalpy otyrysynda «2025 – 2027 jyldarǵa arnalǵan respýblıkalyq bıýdjet týraly» zań jobasyn talqylaý kezinde QR Qarjy mınıstri Mádı Takıev aıtty.

2025 jyly Áleýmettik medıtsınalyq saqtandyrý qoryna 675 mlrd teńge baǵyttalady

Onyń aıtýynsha, halyq sanynyń ósýi men naýqastar sanynyń artýyn eskere otyryp, tegin medıtsınalyq kómektiń kepildendirilgen kólemi men mindetti áleýmettik medıtsınalyq saqtandyrý aıasynda halyqty medıtsınalyq kómekpen qamtýdy ulǵaıtý qarastyrylǵan.

«Densaýlyq saqtaý júıesine 2025-2027 jyldarǵa arnalǵan shyǵystar 7,6 trln teńgeni quraıdy. Onyń ishinde bıylmen salystyrǵanda 180 mlrd teńgege ulǵaıyp, 2025 jylǵa 2,4 trln teńge qarastyrylǵan. Jalpy, 2025 jyly tegin medıtsınalyq kómektiń kepildik berilgen kólemine 1,6 trln teńge somasynda shyǵystar josparlandy. Áleýmettik medıtsınalyq saqtandyrý qoryna 675 mlrd teńge, onyń ishinde memlekettik jarnalarǵa 668 mlrd teńge kózdelgen», - dedi mınıstr.

Budan buryn habarlanǵandaı, búgin Májilistiń jalpy otyrysynda Premer-mınıstrdiń orynbasary – Ulttyq ekonomıka mınıstri Nurlan Baıbazarov elmizdiń 2025 – 2029 jyldarǵa arnalǵan áleýmettik-ekonomıkalyq damý boljamyn tanystyrdy.