Tegin medıtsınalyq kómekti qarjylandyrý kózderi artady — vıtse-premer

ASTANA. KAZINFORM — Qaıyrymdylyq qorlar men halyqaralyq uıymdar medıtsınalyq kómekti qarjylandyratyn bolady. Bul týraly Úkimet otyrysynda Premer-mınıstrdiń orynbasary — Mádenıet jáne aqparat mınıstri Aıda Balaeva aıtty. 

— Azamattardyń densaýlyǵyn qorǵaý quqyǵy tolyq saqtalady. Tegin medıtsınalyq kómekti qarjylandyrý kózderi artady. Burynǵydaı tek memlekettik bıýdjetke ǵana súıenbeı, bul iske qaıyrymdylyq qorlar, halyqaralyq uıymdar jáne iri kompanııalar da atsalysady. Mindetti áleýmettik medıtsınalyq saqtandyrý júıesiniń róli arta túspek. Kezeń-kezeńimen engiziletin biryńǵaı bazalyq medıtsınalyq paket arqyly azamattar josparly ári kúrdeli medıtsınalyq qyzmetterdiń basym bóligine osy saqtandyrý esebinen qol jetkize alady, — dedi Aıda Balaeva.

Onyń aıtýynsha, jańa Konstıtýtsııanyń qabyldanýyna baılanysty «Halyq densaýlyǵy jáne densaýlyq saqtaý júıesi týraly» kodekske, sondaı-aq medıtsınalyq saqtandyrý jáne bıologııalyq qaýipsizdik salalaryn retteıtin zańdarǵa tıisti ózgerister engiziledi.

— Osylaısha memleket kepildik bergen medıtsınalyq kómektiń kólemi saqtalady. Eń bastysy, azamattardyń quqyqtary saqtalyp qana qoımaı, qosymsha ınstıtýtsıonaldyq turǵydan nyǵaıtylady, — dedi vıtse-premer.

Aıta keteıik, Úkimet jańa Konstıtýtsııa normalaryn júzege asyrý joldaryn talqylap jatyr.