Tegin medıtsınalyq kómek: patsıent bilýi tıis bes mańyzdy jaıt
PETROPAVL. KAZINFORM — Patsıentter arasynda medıtsınalyq qyzmetke joldama alý, dáriger qabyldaýyna jazylý jáne kórsetilgen qyzmet úshin aqy talap etýge qatysty máseleler áli de bar.
Áleýmettik medıtsınalyq saqtandyrý qorynyń (MÁMS) Soltústik Qazaqstan oblysy boıynsha fılıal dırektory Aınagúl Davletchına patsıentterdiń quqyqtary buzylǵan jaǵdaıda qaıda júginý kerektigin aıtty.
— MÁMS júıesinde saqtandyrylmasa, qandaı qyzmetter tegin bolady?
— Azamattarǵa saqtandyrylǵan-saqtandyrylmaǵanyna qaramastan, tegin medıtsınalyq kómektiń kepildik berilgen kólemi (TMKKK) aıasynda birqatar qyzmet kórsetiledi.
Olardyń ishinde jedel járdem, shuǵyl jáne alǵashqy medıtsınalyq-sanıtarııalyq kómek, vaktsınatsııa, sondaı-aq týberkýlez, AITV-ınfektsııasy, onkologııa sııaqty áleýmettik mańyzy bar aýrýlar boıynsha medıtsınalyq kómek bar.
Al MÁMS paketine kiretin qyzmetterdi alý úshin saqtandyrylǵan mártebesi qajet. Sondyqtan jarnalardy turaqty tóleý azamattyń jeke mártebesin saqtap qana qoımaı, búkil ortaq júıeniń turaqtylyǵyn qamtamasyz etýge yqpal etedi. Nátıjesinde osy júıe arqyly dál qazir qymbat emge muqtaj adamdarǵa medıtsınalyq kómek kórsetiledi.
— Naýqastar keıde dárigerdiń qajetti taldaýlarǵa nemese dıagnostıkalyq tekserýlerge joldama bermeıtinine shaǵymdanady. Mundaı jaǵdaıda ne isteý kerek?
— MÁMS aıasynda beıindi mamannyń konsýltatsııasyn alý, taldaýlar tapsyrý nemese dıagnostıkalyq zertteýlerden ótý úshin saqtandyrylǵan mártebesi bolýy qajet. Sonymen birge qosymsha tekserýlerdi taǵaıyndaý týraly sheshimdi patsıenttiń ózi emes, medıtsınalyq kórsetilimderdi eskere otyryp, emdeýshi dáriger qabyldaıdy.
Eger patsıent qosymsha tekserilýim qajet dep sanasa, eń aldymen ózi tirkelgen medıtsınalyq uıymdaǵy Patsıentterdi qoldaý jáne ishki saraptama qyzmetine júgingeni jón. Bul qyzmet máseleni sol jerde, múmkindiginshe jedel sheshýge kómektesedi. Onyń negizgi mindetteriniń biri — patsıenttiń tıisti medıtsınalyq kómekti tolyq kólemde alýyna yqpal etý.
Eger másele medıtsınalyq uıym deńgeıinde sheshilmese, Áleýmettik medıtsınalyq saqtandyrý qoryna olardyń resmı saıty — msqory.kz arqyly ótinish berýge bolady.
— Dáriger joldama bergenimen, beıindi mamanǵa nemese dıagnostıkalyq tekserýge jazylý múmkin bolmasa ne isteýi kerek?
— Mundaı jaǵdaıda medıtsınalyq uıym patsıentke balama marshrýt usynýǵa tıis. Josparly túrde beıindi mamannyń konsýltatsııasyn alý nemese dıagnostıkalyq zertteýden ótý úshin kútý merzimi 15 jumys kúninen aspaýǵa tıis.
Eger medıtsınalyq uıym osy merzimde qajetti qyzmetti kórsete almasa nemese emhanada tıisti maman ne jabdyq bolmasa, medıtsınalyq kórsetilimder bolǵan jaǵdaıda patsıent qyzmetti birlesip oryndaý sharty boıynsha kórsetetin basqa medıtsınalyq uıymǵa jiberilýi kerek.
Eń bastysy, emhanadaǵy mamannyń nemese jabdyqtyń bolmaýy patsıentti aqyly emdelýge májbúrleýge negiz bola almaıdy. Medıtsınalyq uıym qajetti kómekti uıymdastyrýdyń balama jolyn qarastyrýy qajet.
— Keıde patsıentter tegin alýy tıis medıtsınalyq qyzmet úshin aqy tóleý talap etilgenin aıtady. Bul zańdy ma?
— Densaýlyq kodeksiniń 202-babynyń 9-tarmaǵyna sáıkes, tegin medıtsınalyq kómektiń kepildik berilgen kólemi jáne (nemese) MÁMS júıesi aıasynda kórsetiletin medıtsınalyq kómekti aqyly negizde usynýǵa tyıym salynady.
Eger patsıentten TMKKK nemese MÁMS paketine kiretin medıtsınalyq kómek úshin aqy talap etilse, Qor ótinishti qarap, máseleniń sebepterin anyqtaıdy. Budan keıin zańbuzýshylyqty Qordyń fılıaly men medıtsınalyq uıym deńgeıinde joıý sharalary qabyldanady.
Shaǵymda kórsetilgen derekter rastalǵan jaǵdaıda, patsıenttiń kepildik berilgen medıtsınalyq qyzmetterdi alý quqyǵyn qorǵaý sharalary qoldanylady. Al medıtsınalyq uıymdarǵa medıtsınalyq kómektiń sapasy men kólemine júrgizilgen monıtorıng nátıjeleri jáne qyzmetterdi satyp alý shartynyń talaptary negizinde qarjylyq yqpal etý sharalary qoldanylady.
— Medıtsınalyq aqparattyq júıede patsıent almaǵan qyzmet kórsetilgen bolsa, mundaı jaǵdaıda qandaı áreket jasaý kerek?
Eger medıtsınalyq aqparattyq júıeniń qosymshasynda ózińiz almaǵan medıtsınalyq qyzmet týraly málimet kórsetilse, aldymen sol jazbada kórsetilgen medıtsınalyq uıymǵa habarlasyp, aqparattyń durystyǵyn teksergen jón. Eger qyzmettiń is júzinde kórsetilmegeni rastalsa nemese 1414 nómirinen ózińiz almaǵan medıtsınalyq qyzmet týraly SMS-habarlama kelse, Áleýmettik medıtsınalyq saqtandyrý qoryna júginý qajet.
Qordyń tekserý júrgizýi úshin resmı baılanys arnalary arqyly ótinish berip, jeke derekterińizdi kórsetý kerek. Ótinishke qyzmet kórsetilgen kezeń, kúni jáne tıisti jazbany engizgen medıtsına qyzmetkeri týraly aqparat kórinetin skrınshottardy qosa tirkegen jón.
Sonymen qatar Qor medıtsınalyq qyzmetterdi qarjylandyrýdy basqarýǵa arnalǵan biryńǵaı tsıfrlyq orta — Qalqan júıesin qalyptastyryp jatyr. Ol medıtsınalyq kómek kólemin josparlaýdan bastap, qyzmet aqysyn tóleý men jumsalǵan qarajattyń tıimdiligin baǵalaýǵa deıingi barlyq úderisti baqylaýǵa múmkindik beredi.
Osy tsıfrlyq sheshimder aıasynda patsıentter kórsetilgen medıtsınalyq qyzmetter men olar úshin tólengen qarajat týraly aqparatty eGovMobile qosymshasy men Patsıenttiń biryńǵaı jeke kabıneti arqyly kóre alady. Sondaı-aq tirkelgen qyzmettermen tanysyp, olardyń shynymen kórsetilgenin rastaýǵa jáne zańbuzýshylyq anyqtalǵan jaǵdaıda shaǵym joldaýǵa múmkindik alady.
— Jalpy, patsıenttiń quqyǵy buzylsa, qaıda júgingeni durys?
— Eń aldymen, medıtsınalyq uıymnyń ózindegi Patsıentterdi qoldaý jáne ishki saraptama qyzmetine júginýge keńes beremiz. Kóptegen máseleni osy deńgeıde jedel sheshýge bolady.
Eger másele sheshilmese, Áleýmettik medıtsınalyq saqtandyrý qoryna msqory.kz resmı saıty arqyly ótinish berýge bolady. Ótinishte jaǵdaıdy naqty baıandap, múmkindiginshe tıisti dálelderdi tirkegen jón.
Eger ótinishte kórsetilgen derekter rastalsa, Qor zańnamada jáne shart talaptarynda kózdelgen sharalardy qabyldaıdy.
Biz úshin ótinishti tirkeý ǵana emes, anyqtalǵan buzýshylyqty joıý jáne patsıenttiń medıtsınalyq kómekti ýaqtyly, qoljetimdi ári sapaly alý quqyǵyn qalpyna keltirý mańyzdy.
Buǵan deıin 2027 jyldan bastap azamattar saqtandyrýsyz qandaı medıtsınalyq qyzmetterdi tegin alatynyn jazǵan edik.
