«Tegin» eńbek: SQO-da memqyzmetshilerdiń eńbek quqyǵy buzylyp kelgen
PETROPAVL. KAZINFORM — Soltústik Qazaqstan oblysynda memlekettik qyzmetshiler artyq jumys istep, ol úshin eshqandaı ótemaqy almaǵan.
Memlekettik qyzmette jumys ýaqyty keıde túnge deıin sozylýy múmkin. Qyzmetkerler jumysqa qosymsha tartylǵanymen, ol resmı tirkelmeıdi, saldarynan ótemaqy da tólenbeıdi. Bul tekseris barysynda taǵy da rastaldy.
Memlekettik qyzmet isteri agenttiginiń SQO boıynsha departamentiniń málimetinshe, osy jyldyń birinshi toqsanynda vedomstvo óńirdegi 100 memlekettik organda 106 monıtorıng júrgizgen. Nátıjesinde 59 memlekettik qyzmetshiniń eńbek quqyǵy buzylǵany anyqtaldy. Olarǵa qosymsha demalys kúnderi berildi nemese ótemaqy tólendi.
QR eńbek zańnamasyna, sondaı-aq «Memlekettik qyzmet týraly» Zańyna sáıkes, memlekettik qyzmetshilerdiń jumys ýaqyty belgilengen normalarmen qatań retteledi. Jumys kúniniń uzaqtyǵy, ústeme jumysqa tartý tártibi zańdylyq, ádildik jáne memlekettik qyzmetshilerdiń quqyqtarynyń buzylýyna jol bermeý qaǵıdattary eskerile otyryp aıqyndalady. Alaıda is júzinde bul talap saqtala bermeıdi.
— Eń jıi kezdesetin zańbuzýshylyqtardyń qatarynda qyzmetkerlerdi resmı rásimdeýsiz ústeme jumysqa tartý, naqty jumys ýaqytyn esepke almaý jáne ótemaqynyń berilmeýi bar. Keıbir jaǵdaılarda qyzmetkerler artyq jumys istegenimen, bul ýaqyt tabelde kórsetilmeı qalady. Zań boıynsha qyzmetkerdi qosymsha jumysqa tek onyń kelisimimen tartýǵa bolady jáne ol mindetti túrde qosymsha demalys nemese aqshalaı tólem arqyly ótelýi tıis. Biraq keıde qyzmetkerlerdiń qosymsha jumys istegen saǵattary jınalǵanymen, keıin oǵan demalys berilmeıdi, — deıdi departamenttiń bas mamany Darhan Ermekov.
Mamandardyń aıtýynsha, bul másele tek quqyq buzýshylyq qana emes, sonymen qatar qyzmetkerlerdiń eńbek ónimdiligine de keri áser etedi. Sharshaǵan qyzmetkerden joǵary nátıje kútý qıyn.
— Jumys ýaqyty rejımin saqtaý — basshylardyń tikeleı jaýapkershiligi. Qyzmetkerlerdi negizsiz ústeme jumysqa tartýǵa jol berilmeýi tıis. Osyǵan baılanysty memlekettik organdarda baqylaý kúsheıtilip jatyr, — deıdi Darhan Ermekov.
Aldaǵy ýaqytta mundaı jaǵdaılardyń aldyn alý úshin jumys ýaqytyn esepke alýdyń tsıfrlyq júıelerin engizý, sondaı-aq memlekettik qyzmetshiler arasynda eńbek quqyqtary boıynsha túsindirý jumystaryn kúsheıtý josparlanyp otyr.
Buǵan deıin Parlament Májilisiniń jalpy otyrysynda «Qazaqstan Respýblıkasynyń memlekettik qyzmeti týraly» Zańy men ilespe qujat ekinshi oqylymda qaralyp, qabyldanǵanyn jazǵan edik.
