Tegin dári naýqasqa emes, saýdaǵa ketken: elde 26 myńnan asa dári satylǵan
ASTANA. KAZINFORM — Tegin dáriler naýqastarǵa jetpeı, dárihanadan satylyp ketken. Saldarynan keltirilgen zalal 36 mln teńgeden asqan, dep habarlaıdy Úkimettiń baspasóz qyzmeti.
Memleket basshysynyń densaýlyq saqtaý salasyn tsıfrlandyrý jónindegi tapsyrmalaryn júzege asyrý aıasynda Qazaqstanda dárilik zattardy tsıfrlyq tańbalaý jáne qadaǵalaý júıesi jumys isteıdi. Ol árbir dári-dármek qaptamasynyń óndirýshiden bastap patsıentke deıingi qozǵalysyn baqylaýǵa, sondaı-aq el boıynsha dárilik zattardyń qoryn qadaǵalaýǵa múmkindik beredi.
— Tsıfrlyq baqylaýdyń nátıjesinde dárihana jelisi arqyly 26 myńnan astam qaptama tegin dárilik preparattyń satylǵany anyqtaldy. Anyqtalǵan faktiler boıynsha 106 medıtsınalyq uıym men dárihanaǵa qatysty tekserý júrgizildi. 60-tan astam uıym ákimshilik jaýapkershilikke tartyldy, salynǵan aıyppuldardyń jalpy somasy 20 mln teńgeden asty. Aldyn ala esepteýler boıynsha keltirilgen zalal 36 mln teńgeden asady. Materıaldar quqyq qorǵaý organdaryna joldandy, — dedi Qazaqstan Respýblıkasy Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń tóraǵasy Baýyrjan Júsipov.
Osy jyldyń qyrkúıek aıynan bastap tsıfrlyq tańbalaý taǵamǵa bıologııalyq belsendi qospalarǵa (BBQ) da engizildi, al 2027 jyldan bastap bul júıe medıtsınalyq maqsattaǵy buıymdarǵa da qoldanylady.
Buǵan deıin tegin dári týraly aqparatty tez alýǵa kómektesetin chat-bot qalaı jumys isteıtinin jazǵanbyz.
