Tegin beriletin jer telimderiniń kezegi nelikten baıaý — depýtat jaýaby

ALMATY. KAZINFORM — Májilis depýtaty Baqytjan Bazarbek azamattardyń tegin alýǵa quqyǵy bar jer telimderiniń berilý tártibin túsindirdi. 

Depýtat jer ýchaskelerin berý normalary Jer kodeksiniń 50-babynda kórsetilgenin atap ótti. Ol boıynsha jeke turǵyn úı qurylysy úshin — 0,10 gektar, aýyldyq jerlerde ózindik qosalqy sharýashylyq júrgizý úshin — sýarylmaıtyn jerde 0,25 gektar jáne sýarmaly jerde 0,15 gektar, baǵbandyq, sondaı-aq saıajaı qurylysy úshin — 0,12 gektar jer aqysyz beriledi.

— Biraq Jer kodeksiniń 43-babyna sáıkes, jeke turǵyn úı qurylysyn júrgizý úshin jer telimderi tizim boıynsha beriledi. Ol tizimdi arnaıy esep dep ataıdy. Jer bosaǵan jaǵdaıda ol berile salmaıdy, sý jáne elektr jelisi júrgizilýi tıis. Injenerlik ınfraqurylymmen qamtamasyz etilý kerek. 2022-2023 jyldary 53 myń ýchaskege 40 mlrd teńge bólingen bolatyn. 2023-2024 jyldary 50 mlrd teńge bólindi. Keıin bıýdjet tapshylyǵy paıda bolyp, bıýdjet aqshasy qysqartyldy, endi 10 myń ýchaskege qarajat bólinip otyr. Ol — jetkiliksiz. Sondyqtan aldaǵy ýaqytta bıýjetti talqylaý barysynda jeke turǵyn úı qurylysyn júrgizý úshin bólinetin qarajatty kóbeıtýdi talap etemiz, — dedi ol.

Baqytjan Bazarbektiń aıtýynsha, qazir turǵyndarǵa bos ýchaske berilse, sol azamattardyń ózderi jaǵdaı jasalmaǵanyna shaǵym bildiredi.

— Adamdarǵa bos dalany bere salmaıdy. Aldymen, adamdardyń qolaıly turýyna jaǵdaı jasalýy tıis. Al bul jerlerde sý jáne elektr jelilerin tartý úshin jobalaý-smetalyq qujattama ázirleý kerek, keıin bas jospar men egjeı-tegjeıli josparǵa ózgeris engizýimiz kerek. Odan bólek qurylys jumystary júrgiziledi — munyń barlyǵy úlken qarajatty talap etedi, — dedi ol.

Eske salaıyq, buǵan deıin Almatyda tegin 10 sotyq jer berý toqtatylǵanyn jazǵanbyz.