Tegin avtobýstar: Almaty ákimdigi Qazaqstan-Slovenııa oıyny aldynda málimdeme jasady

ALMATY. KAZINFORM - 13 qazan kúni saǵat 18:00-de Almatynyń Ortalyq stadıonynda ÝEFA Ulttar lıgasynyń toptyq kezeń aıasynda "Qazaqstan–Slovenııa" matchy ótedi.

Almaty qalasynyń Sport basqarmasy jankúıerlerge bıletti aldyn ala Qazaqstan fýtbol federatsııasynyń resmı seriktesi Ticketon qyzmetinen satyp alýǵa jáne dúrligip, yǵy-jyǵy bolmas úshin Ortalyq stadıonǵa erterek kelýge shaqyrdy. Bılet stadıon kassasynda satylmaıdy. Ortalyq stadıonǵa saǵat 16:00-den bastap kirýge bolady.

- Deldaldardan bılet satyp almańyz. Ótkizý júıesin jaqsartý úshin bıletke adamnyń aty-jóni jazylady. Stadıonǵa bılette jazylǵan adam jeke basyn kýálandyratyn qujatyn (jeke kýálik, tólqujat, júrgizýshi kýáligi) kórsetken soń kirgiziledi, - dep habarlady basqarmadan.

Sondaı-aq basqarma málimetine sáıkes, jolaýshylar leginiń artýyna baılanysty Ortalyq stadıon arqyly ótetin №34, 92, 118, 120, 120a, 79, 121 avtobýstarynyń baǵyty kúsheıtiledi. Oǵan qosymsha 8 avtobýs bólinip, tegin ekspress-marshrýttar uıymdastyrylady:

* «Shuǵyla-City TÚK aıaldamasy – Ortalyq stadıon»;
* «Halyk Arena aıaldamasy – Ortalyq stadıon»;
* «Alataý teatry aıaldamasy – Ortalyq stadıon»;
* «Almaty-1 temirjol vokzaly aıaldamasy – Ortalyq stadıon».

Avtobýstar saǵat 16:00-de júrip, 20:30-da keri qaıtady. Ortalyq stadıonnan shyǵatyn avtobýstar Abaı dańǵyly men Sátbaev kóshesiniń arasyndaǵy Baıtursynov kóshesiniń boıyndaǵy turaqta turady. Sonymen qatar, jedel marshrýttardyń jınalý oryndary 2GIS servısinde jazylady.

Eske salaıyq, Almatyda ótken Qazaqstan-Norvegııa matchynynyń aldynda Qazaqstan Fýtbol federatsııasy da eskertý jarııalaǵan bolatyn.