Tegin advokat qyzmetin qalaı alýǵa bolady
ASTANA. KAZINFORM — Astana qalasy Ádilet departamenti basshysynyń orynbasary Baqytjan Beısen qalalyq kommýnıkatsııalar qyzmetinde ótken brıfıngte memleket kepildik bergen zań kómegin alý jóninde málimdeme jasady.
Mamannyń sózinshe, memleket kepildik bergen zań kómegi – azamattardyń bilikti zań kómegin alý quqyǵyn qamtamasyz etetin mańyzdy tetik. Ol halyqtyń materıaldyq jaǵdaıyna qaramastan, zańda kózdelgen sanattaǵy azamattarǵa tegin quqyqtyq qoldaý alýǵa múmkindik beredi.
Sonymen qatar, QR Konstıtýtsııasyna jáne «Advokattyq qyzmet jáne zań kómegi týraly» Zańyna sáıkes, memleket kepildik bergen zań kómegi quqyqtyq konsýltatsııa berý, zańdyq qujattardy ázirleý, sondaı-aq azamattardyń sottar men memlekettik organdardaǵy múddelerin qorǵaý jáne bildirý túrinde kórsetiledi.
Atap aıtqanda, myna sanattaǵy jandar tegin advokat qyzmetine júgine alady:
· Alıment tobyndaǵy azamattar;
· Zeınetaqy jáne járdemaqy alý quqyǵyna ıe tulǵalar;
· Kópbalaly analar;
· Asyraýshysynan aıyrylǵandar;
· Uly Otan soǵysy ardagerleri men oǵan teńestirilgender;
· Qylmystyq izge túsý amaldary oryn alǵannan bastap aıyptalýshy, jábirlenýshi jáne sottalýshy;
· Zorlyq-zombylyqqa dýshar bolǵandar.
Odan bólek, terrorızmge qatysty qylmystyq ister boıynsha memleket tarapynan tegin zań kómegin kórsetý kózdelgen.
Taǵy bir aıta ketetin mańyzdy jaıt – alıment tobyndaǵy azamattar, zeınetaqy jáne járdemaqy alatyn kisiler, kópbalaly analar tek osy máseleler aıasynda týyndaǵan daýlar boıynsha tegin advokat kómegin alýǵa quqyly.
– Mysaly, bir kópbalaly ana saýdamen aınalysady delik. Eger áldekim mindettemelerin oryndamaı, saýda salasynda jańaǵy kópbalaly ananyń quqyǵyn buzsa, onda bul kommertsııalyq daý sanalady da, tegin quqyqtyq kómek kórsetilmeıdi, – dep túsindirdi Baqytjan Beısen.
Demek, atalǵan sanattaǵylarǵa tek alıment, járdemaqy, zeınetaqy alý boıynsha daýlarda ǵana tegin advokat qyzmeti kórsetiledi.
Zań kómegin kórsetý tártibi
Baqytjan Beısen zań kómegin advokattar men zań konsýltanttary kórsetetinin atap ótti. Advokattar qylmystyq ister boıynsha qorǵaýdy júzege asyryp, azamattardyń sottaǵy múddesin qorǵaıdy. Al zań konsýltanttary quqyqtyq keńes berip, aryzdar, shaǵymdar men ózge de zańdyq qujattardy ázirleýge kómektesedi.
Quqyqtyq konsýltatsııany azamattar mamandarǵa tikeleı júginý nemese «E-Zań kómegi» aqparattyq júıesi arqyly ala alady. Eger kómekti ótinish berilgen kúni kórsetý múmkin bolmasa, ol zańnamada belgilengen merzimde, tıisti jaǵdaılarda úsh jumys kúninen keshiktirilmeı berilýi tıis.
Al zań kómegin kórsetken mamandar aqy tóleýge arnalǵan elektrondyq ótinishti biryńǵaı aqparattyq júıe arqyly qalyptastyrady. Ádilet departamenti usynylǵan qujattardyń tolyqtyǵy men durystyǵyn teksergennen keıin, qoldanystaǵy qaǵıdalarǵa sáıkes tólemdi rásimdeıdi.
Zań kómeginiń qoljetimdiligin arttyrý sharalary
Astana qalasynda Ádilet departamenti memleket kepildik bergen zań kómegin kórsetý boıynsha 158 advokatpen jáne 13 zań konsýltantymen kelisim jasasqan. 2026 jyldyń 10 aıynda osy júıe aıasynda 11 284 azamatqa quqyqtyq kómek kórsetildi. Kórsetilgen qyzmetter úshin bıýdjet qarajaty esebinen 247 mln 347 myń teńge bólindi.
Aıta keteıik, qazir zań kómegin kórsetý jáne oǵan aqy tóleý protsesteriniń basym bóligi «E-Zań kómegi» aqparattyq júıesi arqyly júzege asyrylady. Tsıfrlyq platforma ótinishterdi rásimdeýdi, qujattardy joldaýdy jáne kórsetilgen qyzmetterdi esepke alýdy jeńildetedi.
– Astana qalasynyń Ádilet departamenti memleket kepildik bergen zań kómeginiń qoljetimdiligi men sapasyn arttyrý, mamandardyń eńbegine aqy tóleýdiń ýaqtyly júrgizilýin qamtamasyz etý baǵytyndaǵy jumystardy jalǵastyryp jatyr, – dedi Baqytjan Beısen.
Eske salaıyq, buǵan deıin Qazaqstanda advokattar men notarıýstar úshin talaptar jańartylǵanyn jazǵanbyz.
