Tegin 10 sotyq jer: kezekte qansha adam tur
ASTANA. KAZINFORM — Jer kodeksine sáıkes, árbir qazaqstandyq jeke turǵyn úı qurylysy úshin 10 sotyq jer ýchaskesin tegin alýǵa quqyly.
«Jyljymaıtyn múlik boıynsha biryńǵaı memlekettik kadastr» aqparattyq júıesi negizinde «Jer ýchaskesin alý kezeginiń tizilimi» iske asyrylǵan.
— Qazir atalǵan tizilimde 4 257 042 adam tirkelgen. Alaıda jer ýchaskelerin berý máseleleri jáne osyǵan sáıkes tizilimdi júrgizý tikeleı jergilikti atqarýshy organdardyń quzyretine jatady, — degen jaýap aldyq resmı saýalǵa.
Kimder ótinim bere alady?
Kámelet jasyna tolǵan kez kelgen Qazaqstan azamaty ótinim bere alady, onyń menshiginde basqa jer ýchaskesi, páter nemese úıdiń bolýy mańyzdy emes.
Jer ýchaskesin qalaı alýǵa bolady?
10 sotyq jerge ótinim berý jáne kezek kútý mártebesin baqylaý qyzmetine Elektrondyq úkimet portaly arqyly júginýge bolady.
Ol úshin «Jyljymaıtyn múlik» bólimine kirip, «Jer qatynastary» bólimin tańdap, odan keıin «Jeke turǵyn úı qurylysy úshin jer ýchaskesin alý kezegin qaraý nemese tirkeý (10 sotyq)» tarmaǵyn tańdap, «Qyzmetke onlaın tapsyrys berý» batyrmasyn basý qajet. Avtorızatsııadan ótkennen keıin «Ótinish túri» baǵanynda qajetti qyzmetti tańdap, tıisti joldy toltyrasyz.
Sondaı-aq, kezektegi mártebeni Jer kadastrynyń kópshilik kartasy arqyly da tekserý múmkindigi bar.
Sonymen qatar, jer ýchaskesi berilgeni týraly SMS-habarlama arqyly avtomatty túrde habarlaý fýnktsııasy iske qosylǵan. Habarlama jergilikti atqarýshy organdardyń avtomattandyrylǵan «Jer kadastrynyń biryńǵaı memlekettik aqparattyq júıesi» arqyly jiberiledi.
Jerdi kim, qashan jáne qalaı beredi?
— Jer ýchaskeleri tek sý jáne elektr jelileri tartylǵan aýmaqtardan ǵana beriledi;
— Jer berý týraly sheshimdi jergilikti ákimdik qabyldaıdy. Olar jer ýchaskesin daıyndaý barysy jáne kezektegi tizim týraly aqparatty saıtta jáne buqaralyq aqparat quraldarynda qazaq jáne orys tilderinde toqsan saıyn jarııalap otyrýǵa mindetti;
— Jerdi jeke menshikke turǵyn úı salynǵannan keıin alýǵa bolady. Al ıgerý kezeńinde jer jalǵa beriledi;
— Jeke menshikke berý týraly sheshim úıdi paıdalanýǵa qabyldaý aktisi negizinde qabyldanady;
— 10 sotyq tegin jer tek bir ret, kezek kelgen oblys/qala aýmaǵynan ǵana beriledi. Qalǵan ótinim joıylady.
— Memleketten buryn tegin jer alǵan nemese jergilikti bos jer joq bolǵan jaǵdaıda, kezekke turý múmkin emes.
Aıta keteıik, tegin alǵan 10 sotyq jer úı salýǵa jaramsyz bolsa, qaıtadan kezekke turýǵa bolady.
Ótken jyly Májilis depýtaty Ulasbek Sádibekov halyqqa 10 sotyq jer telimin berý máselesin kóterip, usynys aıtqan edi.