Tegin jol júrý bıleti, áleýmettik paket, baspana: Astananyń úzdik volonterlerine qoldaý kórsetiledi
Dástúrge aınalǵan «Jastar Synergy» jastar lageri bıyl «Jastar jalyny Camp» ataýymen ótedi. Onda jastar bıznes, mádenıet jáne sport, áleýmettik salalar boıynsha ázirlegen jobalaryn usynady.
«Búgingi lager qalanyń eń belsendi jastaryna arnalǵan. Ol úshin onlaın-rejımde irikteý júrgizdik. Oǵan ótinim berip, qyzyqty jobalar usynǵan júzge jýyq jastardy tańdap aldyq. Esh shekteý bolǵan joq, qatysýshylar arasynda oqýshylar da, stýdentter de, 29 jasqa deıingi mamandar da bar. Jıyndy erteń qorytyndylap, iriktelgen jobalalr týraly qosymsha habarlaımyz», - dedi Nur-Sultan qalasy Qoǵamdyq damý isteri basqarmasynyń basshysy Talǵat Rahmanberdi tilshilerge bergen suhbatynda.
Sonymen birge, spıker Jastar jyly aıasyndaǵy qoldaý sharalary jóninde áńgimeledi.
«Jastar jyly aıasynda elimizde jáne Nur-Sultan qalasynda aýqymdy sharalar ótip jatyr. Jaqynda Nur-Sultan, Almaty, Shymkent qalalarynda jastarǵa jalǵa beriletin baspana baǵdarlamasy bastaldy. Bul bastamany jastardyń ózi usynǵan edi. Jyl sońynda deıin lagerler men «Elorda jastary» baıqaýy uıymdastyrylyp, qaıyrymdylyq baly ótedi. Kelesi jyly «Astana jastary» uıymyna volonterlardy kóptep tartamyz jáne olarǵa arnaıy áleýmettik paket berýdi qarastyramyz. Eń belsendi eriktilerge jol júrý bıleti tegin berilýi múmkin», - dedi ol.
Elorda ákimdigi janyndaǵy «Astana jastary» KMM jetekshisi Shyńǵys Tileýlın jastar lageriniń úshinshi jyl qatarynan uıymdastyrylyp jatqanyn jetkizdi. Jıyn qalanyń eń belsendi jastaryn biriktirýdi kózdeıdi.
«Prezıdent Joldaýynan keıin mundaı sharalar belsendi uıymdastyrylyp jatyr. «Halyq únine qulaq asatyn memleket» túsinigi dál osyndaı netvorkıng-formatta kórinis tabady dep oılaımyn. Munda jastar ózderin tolǵandyryp júrgen máselelerin aıtyp, qyzyqty jobalaryn usyna alady. Bul joba buryn «Jastar Synergy» dep atalǵan. Jastar jylynda «Jastar Jalyny camp» dep ózgerttik. Bul joba úlken suranysqa ıe. Eń belsendi, kósh bastaǵan jastardy, stýdentterdi, volonterlerdi iriktep alýǵa tyrystyq», - deıdi Sh. Tileýlın.
Uıym basshysy jastar jobasyn irikteý jumystarynyń qalaı júrgiziletinin áńgimeledi.
«Munda áleýmettik jobalarǵa erekshe kóńil bólemiz. Paıda tabýdy kózdegen biraz jobadan bas tartýǵa týra keldi. Áleýmettik máselelerdi, ýrbanıstıka, qalaǵa kómektesý týraly jobalardy tańdap aldyq. Máselen, qatysýshylardyń biri ózdiginen qoqysty retteıtin «aqyldy» qoqys konteıneri jobasyn jasady. Onyń quny qoqys óńdeý zaýyttarynyń qunynan arzan. Osylaısha, bıýdjettiń biraz qarjysyn únemdeýge bolady. Bul óte qyzyq joba. Tipti ınvestorlar qyzyǵýshylyq tanytty. Osyndaı qııaly sheksiz jastardy jınaýǵa tyrysamyz», - dedi ol.
Jastar lagerine arnaıy shaqyrylǵan qonaqtar erkin formatta kezdesý ótkizdi. Olardyń arasynda aktrısa, psıholog Almıra Tursyn, aktırsa, sportshy Móldir Mekenbaeva, «100 Jańa esim» jobasynyń jeńimpazy, kásipker Tilektes Adambaev, ınvestor Serik Baıgıreev, «Rixos Pro» kompanııasynyń bas dırektory Vahıl Gasanov, «Metsenat» qarjy kompanııasynyń bas dırektory Jandar Sadyqov jáne taǵy da basqa qoǵam qaıratkerleri bar. Solardyń biri «Bolashaq» baǵdarlamasynyń túlegi, Eurasia blockchain fintech group kompanııasynyń basqarma tóraǵasy Tilektes Adambekov jastarmen óz tájirıbesin bólisti.
«Qazirgi jastardyń talaby joǵary. Sebebi jańa tehnologııa men Internet qarqyndy damyp keledi. Men Qytaıda kórgen-bilgenimdi, memlekettik qyzmet pen halyqaralyq kompanııalarda jınaǵan tájirıbemdi jastarmen bóliskim keledi. Men memlekettiń bar múmkindikterin, granttaryn paıdalandym. Sebebi bilim óte mańyzdy. Meniń maqsatym – bilim arqyly ómirimniń qalaı ózgergenin kórsetý. Sonymen birge, netvorkıng-format jastar úshin óte paıdaly, bir-birimen tanysyp, qarym-qatynas ornatady», - dedi T. Adambekov.
Aıta keteıik, úsh kúnge sozylatyn lager baǵdarlamasynda jastarǵa arnalǵan sheberlik saǵattary men trenıngter, fýtbol jáne voleıboldan týrnırler ótedi. Sonymen birge, jastardy zııatkerlik oıyndar, sporttyq, shyǵarmashylyq jarystar jáne «Open Air» keshi uıymdastyrylady.
