Tegin jer telimin berýge shekteý ádilettilik qaǵıdattaryna qaıshy keledi - A. Turtaev
ASTANA. 6 naýryz. QazAqparat - Jer kodeksine engizýge usynylǵan tegin jer telimin berýge shekteý ádilettilik qaǵıdattaryna qaıshy keledi. Bul týraly búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Almas Turtaev málim etti.
Eske salsaq, buǵan deıin Májiliske usynylǵan Jer kodeksine engizilgen ózgerister negizinde Astana men Almatynyń jáne oblys ortalyqtarynda jer jeke menshikke berilmeıtini aıtylǵan edi.
Al depýtattyń aıtýynsha, qazirgi qoldanystaǵy Jer kodeksine sáıkes, Qazaqstan Respýblıkasynyń azamattaryna jeke menshikke aýyldyq jerlerde ózindik qosalqy sharýashylyq (úı mańyndaǵy jáne egistik telimderdi qosa alǵanda) júrgizý úshin - sýarylmaıtyn jerde 0,25 gektar jáne sýarmaly jerde 0,15 gektar jeke turǵyn úı qurylysy úshin - 0,1 (10 sotyq) gektar jáne baǵbandyq, sondaı-aq saıajaı qurylysy úshin - 0,12 gektar jer telimi tegin beriledi. Sonymen qatar, «Jeke turǵyn úı qurylysy týraly» Zańǵa sáıkes, Qazaqstan Respýblıkasynyń árbir azamaty, óziniń turaqty turǵyn jerine qaramastan respýblıka aýmaǵynda jeke turǵyn úı qurylysy úshin jer ýchaskesin alýǵa quqyly.
«Búgingi kúnde bul qalalarda edáýir azamattarymyz óziniń zańdy quqyǵyn paıdalanyp, jer telimin tegin alyp úlgerdi. Al, memleketten tegin jer alýǵa tizimde burynnan turǵan kóptegen azamattarymyzdyń quqyǵymen qatar, zań jobasy qabyldanǵan jaǵdaıda, ádilettilik qaǵıdattary da buzylmaqshy. Otbasy, onyń bolashaǵyn osy jermen baılanystyryp otyrǵan januıalar qanshama?! Keń - baıtaq dalamyzdy bilektiń kúshimen naızanyń ushymen qorǵap, bizge mura etip qaldyrǵan keń peıil, darhan babalarymyzdyń urpaǵy bizderge bundaı qadamǵa barý úılesimdi bolmas!», - deıdi A. Turtaev.
Onyń aıtýynsha, bundaı qadamǵa júıeli qarap, saralap zerttep azamattyq ınstıtýttardyń pikirimen sanasyp barý kerek. «Zań jobasy aıasynda Úkimet tarapynan usynylǵan negizinde Astana men Almatynyń jáne oblys ortalyqtarynda jeke turǵyn úı qurylysyna tegin jer bólýge salynatyn shekteýge baılanysty normany qaıta qarastyrýdy suraımyz»,- degen saýal sońyna «Aq jol» QDP Parlamenttik fraktsııa músheleri qol qoıǵan.
