Tegin jer alýǵa nıettilerdiń ótinishin qanaǵattandyrý úshin 90 myń gektar jer telimi qajet - Q. Otarov
ASTANA. 28 aqpan. QazAqparat - Elimizde tegin jer alýǵa nıettilerdiń ótinishin qanaǵattandyrý úshin 90 myń gektar jer telimi qajet. Bul týraly búgin Májiliste «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda Óńirlik damý mınıstrligi Jer resýrstaryn basqarý komıtetiniń tóraǵasy Qadyrhan Otarov málim etti.
«Elimizde jeke turǵyn úı qurylysyn salý úshin jer alýǵa nıettiler sany jyl saıyn 30 paıyzǵa deıin artyp otyr. Eger 2008 jyly jer ýchaskelerine turýshylar kezegi 300 myń azamatty qurasa, sońǵy jyldary olardyń sany 3 esege artty. Al kelip túsken barlyq ótinishterdi qanaǵattandyrý úshin Bas josparlarda 90 myń gektar nemese 900 sharshy shaqyrym jer telimi qarastyrylýy kerek eken. Bunyń ózi elimizdiń eń iri qalalary - Qaraǵandy men Shymkenttiń aýmaǵymen birdeı bolyp tur», - deıdi komıtet tóraǵasy. Onyń sózine qaraǵanda, sońǵy eki jylda bekitilgen jańa Bas josparlarda tek 54 myń gektarǵa deıin ǵana jer telimin jeke turǵyn úı qurylysyn salý úshin berý múmkindigi qarastyrylǵan. Bundaı jaǵdaıda árbir qazaqstandyqty tegin jer ýchaskesimen qamtý esh múmkin emes. Onyń ústine qoldanystaǵy zańnamaǵa sáıkes, jeke turǵyn úı qurylystaryn salý úshin sáıkes ınfraqurylymdar da qarastyrylýy shart.
