Tegin tehnıkalyq-kásiptik bilimge arnalǵan memlekettik tapsyrys 15,5 myń orynǵa deıin artady

ASTANA. QazAqparat - Oqý-aǵartý mınıstrligi elimizdiń barlyq óńiri boıynsha 2023-2029 jyldarǵa arnalǵan bilim berý júıesin damytýdyń Jol kartasyn ázirleýde, dep habarlaıdy QazAqparat.

Jol kartasy bilim berý salasyndaǵy máselelerdi naqty sheshýge jáne ony odan ári damytýǵa baǵyttalǵan. Alǵashqy qujatqa Astana qalasynyń ákimdigi qol qoıdy.

Oqý-aǵartý mınıstri Ǵanı Beısembaev qala ákimi Jeńis Qasymbekke bilim salasyn damytýǵa erekshe kóńil bólgeni úshin alǵysyn bildirdi.

Astana ákimdiginiń jospary boıynsha elordada tolyq kúndik toptary bar balabaqshalar ashylady. Kezekte turǵandardyń kóptigine baılanysty 39 myńǵa jýyq orynǵa memlekettik bilim berý tapsyrysyn ornalastyrý, 2200 orynǵa arnalǵan 22 shaǵyn ortalyq ashý josparlanýda.

«Mektep qurylysyna erekshe kóńil bólemiz. Bıylǵy jyly 24 jaıly mektepti jobalaý bastaldy. Jańa úlgidegi mektepter eki aýysymda 90 myńǵa jýyq oqýshy qabyldaýǵa múmkindik beredi. Sonymen qatar jańa oqý jylynda 13 mektep ashýdy josparlap otyrmyz. Atalǵan sharalar úsh aýysymdy jáne tyǵyz mektepter sanyn azaıtady», - dedi Astana qalasynyń ákimi Jeńis Qasymbek.

Ǵanı Beısembaev bilim sapasyn arttyrýǵa ǵana emes, sonymen qatar balalardyń qaýipsizdigine jáne bilim berý uıymdaryndaǵy oryn tapshylyǵyn azaıtýǵa basa nazar aýdardy.

«Tegin tehnıkalyq jáne kásiptik bilimmen 100% qamtýdy qamtamasyz etý úshin memlekettik tapsyrysty 2026 jylǵa deıin 15,5 myń orynǵa deıin arttyrý josparlanýda. Sondaı-aq 6950 maman kásiporyndardyń maqsatty tapsyrysy boıynsha oqyp, 100% jumysqa ornalastyrylady. Kolledj stýdentteriniń stıpendııasyn 50% - ǵa arttyrý boıynsha sharalar qabyldanýda», - dep atap ótti Oqý-aǵartý mınıstri Ǵanı Beısembaev.

800-ge jýyq oqytýshy biliktilikti arttyrý kýrstarynan ótedi. Kelesi jyly barlyq elorda mektepteri bilim alýshylardyń bilim jetistikteriniń monıtorıngine (BBJM) jáne PISA-nyń jyl saıynǵy zertteýine qatysady. Onyń qorytyndysy aıasynda bilim berý sapasyn arttyrý boıynsha naqty usynymdar beriledi.

Búgingi tańda mınıstrlik oqýshylardy tamaqtandyrýdyń Ulttyq baǵdarlamasynyń jobasyn ázirleýde. Astana mektepterinde tamaqtandyrýdy uıymdastyrý úshin «Tsıfrlyq mektep ashanasy» pılottyq jobasyn engizý usynylady.

Jol kartasyna mektepke deıingi tárbıe men oqytý, orta bilim berýdi damytý, bilim berý sapasyn baǵalaý, ınklıýzıvti bilim berý, balalardyń quqyqtaryn qorǵaý, qosymsha bilim berý, tehnıkalyq jáne kásiptik bilim berý jónindegi is-sharalar, sondaı-aq bilim berý uıymdarynda sybaılas jemqorlyqqa qarsy is-qımyl jónindegi sharalar engizildi.